Samsung, tashmë i pozicionuar si lider në tregun e smartphone-ve me ekran të palosshëm, duket se po eksploron teknologji të tjera të ngjashme një telefon me ekran të rrëshqitshëm. Sipas një patente të zbuluar së fundmi dhe të raportuar nga WearView, kompania koreane ka regjistruar një koncept që kombinon një panel fleksibël me një modul kamere të lëvizshëm në pjesën e pasme.

Dokumentacioni i patentës përshkruan një pajisje ku ekrani mund të zgjerohet gradualisht nga trupi kryesor i telefonit, ndërsa moduli i kamerës së pasme lëviz në sinkron për t’iu përshtatur ndryshimit të formës. Skicat sugjerojnë edhe një prerje të posaçme në panelin e pasmë, e dizajnuar për të akomoduar këtë mekanizëm të pazakontë.

Kur ekrani është i futur brenda shasisë, pajisja i ngjan një smartphone-i klasik premium, në stilin e Galaxy S26 Ultra. Por sapo paneli hapet plotësisht, formati i saj afrohet më shumë me një pajisje të palosshme të tipit libër, si Galaxy Z Fold7.

Patenta përmend gjithashtu përdorimin e sensorëve të avancuar, të aftë për të detektuar ndryshimet në madhësinë e ekranit, zhvendosjen e kamerave, pozicionin e antenave dhe rregullime të tjera harduerike që vijnë si pasojë e ekranit të lëvizshëm. Kjo sugjeron një nivel të lartë kompleksiteti inxhinierik dhe adaptimi dinamik të pajisjes.

Megjithatë, si çdo patentë, edhe kjo nuk garanton një produkt final në treg. Pavarësisht kësaj, fakti që Samsung ka prezantuar një prototip OLED të rrëshqitshëm që në vitin 2023 dhe ka eksperimentuar më herët me dizajne hibride, tregon se ideja mbetet aktive. Koncepti e vendos kompaninë në të njëjtën linjë eksperimentale me projekte si Motorola Moto Rizr dhe Tecno Phantom Ultimate, duke sinjalizuar se e ardhmja e smartphone-ve fleksibël mund të shkojë përtej palosjes klasike.