Në falënderimiN e tyre publik, drejtuesit dhe mbështetësit e klubit vlerësojnë se dy sezonet radhazi në vendin e dytë flasin shumë për rrugëtimin, sfidat dhe rrethanat që kanë shoqëruar skuadrën gjatë kësaj periudhe, ndërsa sqarimet për shumë çështje, sipas tyre, “do t’ia lënë kohës dhe instancave përkatëse”.
Klubi thekson se falë angazhimit të kryesisë, afaristëve, anëtarëve, mërgimtarëve dhe të gjithë kontribuuesve, është arritur stabilitet organizativ dhe financiar, duke realizuar me rregull pagesat për futbollistët dhe stafin gjatë gjithë sezonit.
Sipas njoftimit, një rëndësi e veçantë i është kushtuar edhe gjeneratave të reja, ku mbi 150 fëmijë mbajnë emblemën e klubit dhe përfaqësojnë KF Vëllazërimin në gara të ndryshme anembanë shtetit.
“Kur sheh mbi 150 fëmijë që stërviten çdo ditë dhe përfaqësojnë klubin me krenari, çdo sakrificë merr kuptim”, thuhet në reagim.
Nga klubi potencojnë se KF Vëllazërimi 1977 vazhdon të mbetet institucion futbolli për shqiptarët në Kërçovë, duke angazhuar trajnerë, staf dhe mbi 30 futbollistë të ekipit të parë, me ndikim të drejtpërdrejtë në zhvillimin sportiv dhe shoqëror.
Pavarësisht kritikave dhe pengesave, nga klubi shprehen të vendosur që të vazhdojnë punën me përkushtim që “klubi i vetëm shqiptar në qytet të vazhdojë të ekzistojë dhe të ecë përpara”.
Në fund, KF Vëllazërimi ka falënderuar të gjithë anëtarët dhe mbështetësit që kontribuan gjatë sezonit, duke shprehur besimin se së bashku do të arrijnë edhe më shumë suksese në sezonin e ardhshëm
