Interesi për trashëgiminë kulturore shqiptare po vijon të shënojë rritje të ndjeshme gjatë vitit 2026. Ministri i Turizmit, Kulturës dhe Sportit, Blendi Gonxhja bën të shifrat përgjatë periudhës Janar-Prill 2026, ku plot 219.423 vizitorë vendas dhe të huaj kanë zgjedhur të vizitojnë sitet e trashëgimisë kulturore në vend.

Krahasuar me të njëjtën periudhë të vitit 2023, numri i vizitorëve është rritur me 114%, ndërsa të ardhurat nga këto site kanë shënuar një rritje me 142%. Këto shifra tregojnë një interes në rritje për historinë, kulturën dhe pasuritë arkeologjike të Shqipërisë, si nga turistët e huaj ashtu edhe nga vizitorët vendas.

Interesi në rritje për monumentet historike, muzetë dhe parqet arkeologjike dëshmon se Shqipëria po kthehet në një destinacion gjithnjë e më të preferuar për turistët që kërkojnë të njohin kulturën, historinë dhe traditat e vendit. Sipas të dhënave të publikuara nga Ministri Gonxhja, ndër sitet më të frekuentuara kryeson Kalaja e Gjirokastrës me 34.186 vizitorë. Pas saj renditet Parku Arkeologjik Shkodër me 33.273 vizitorë, ndërsa Parku Kombëtar Butrint ka tërhequr 32.286 vizitorë gjatë katër muajve të parë të vitit.

Në listën e pesë siteve më të vizituara përfshihet edhe Muzeu Gjergj Kastrioti në Krujë me 31.480 vizitorë, si dhe Parku Arkeologjik Apoloni me 20.336 vizitorë.

Kjo rritje është një tregues pozitiv për zhvillimin e turizmit kulturor në Shqipëri dhe për promovimin e vlerave historike e kulturore të vendit në arenën ndërkombëtare.