Mbrëmjen e djeshme në lagjen Kozle të Shkupit është vërejtur një ujk që mbahej si kafshë shtëpiake dhe në trup kishte zinxhir dhe qafore. Pas denoncimit nga qytetarë të shqetësuar, në vendngjarje kanë intervenuar pjesëtarë të Ministrisë së Punëve të Brendshme, ndërsa më pas kanë arritur edhe ekipet profesionale të Kopshti Zoologjik i Shkupit dhe përfaqësues të Qytetit të Shkupit.

Sipas informacioneve, ujku është kapur me sukses dhe në mënyrë të sigurt, pas çka është transportuar në Kopshtin Zoologjik, ku do të kujdesen për të dhe do t’i sigurohen kushte të përshtatshme.

Nga Kopshti Zoologjik njoftojnë se kafsha në periudhën e ardhshme do të qëndrojë në karantinë dhe nën mbikëqyrje të vazhdueshme shëndetësore nga persona profesionalë.

“Fatmirësisht kjo situatë përfundoi pa pasoja, pasi bëhet fjalë për një kafshë të butë dhe të qetë, por edhe një herë apelojmë dhe rikujtojmë se mbajtja e kafshëve të egra si kafshë shtëpiake është e ndaluar dhe jashtëzakonisht e rrezikshme”, thuhet në reagim.

Nga atje theksojnë se ujqit janë kafshë të egra që nuk guxojnë të mbahen në robëri dhe në kushte të papërshtatshme, pasi kanë nevoja natyrore, instinkte dhe sjellje specifike.

Njëkohësisht, u bë apel deri te qytetarët që nëse vërejnë mbajtje ilegale të kafshëve të egra, rastin ta paraqesin tek institucionet kompetente.

Nga Kopshti Zoologjik shprehën falënderim për MPB-në, Qytetin e Shkupit, si dhe për të punësuarit Sasho Pançev dhe Tina Mickovska, për intervenimin e shpejtë dhe të koordinuar.