Në çdo episod të “Top Tech” me Mateo Kadriun zbulojmë të rejat më të fundit nga bota e madhe e teknologjisë. Me informacione dhe gjithçka të detajuar rreth risive dhe mundësive që po na ofrohen çdo ditë sidomos nga Inteligjenca Artificiale me avancimin e projekteve nga më të ndryshme.

Mesa duket kamerat kanë hyrë zyrtarisht në pension. Sepse një kompani amerikane sapo prezantoi një teknologji që mund t’i zëvendësojë komplet. Po flasim për Ouster, një kompani lidar-i që sapo tha: “Po sikur kamera dhe sensori të ishin… e njëjta gje?” Dhe sinqerisht, kjo tingëllon si ideja që lind në orën 3 të mëngjesit mes tre inxhinierëve dhe një pice të ftohtë.

Teknologjia e re quhet “color lidar” dhe në thelb bën dy punë njëherësh. Ajo sheh thellësinë si lidar normal dhe njëkohësisht kap ngjyrat si kamerë. Pra robotaxi tani jo vetëm të sheh, por të sheh edhe me stil. Praktikisht po afrohemi shumë pranë momentit kur makina do të të dallojë edhe nëse ke dalë nga shtëpia me kombinim katastrofë.

CEO i kompanisë tha që kjo është “ëndrra e çdo roboti”. Dhe nuk po tallet. Deri sot kompanitë përdornin kamera plus lidar dhe pastaj përpiqeshin t’i bashkonin të dhënat. Një proces shumë i lodhshëm.

Tani Ouster po i fut të gjitha në një çip të vetëm. Sensori sheh deri në 500 metra larg dhe kompania pretendon se në disa raste është më i mirë se kamerat moderne. Me pak fjalë, roboti i së ardhmes nuk do ketë sy dhe tru të ndarë. Do ketë nje super-sy që bën gjithçka.

Dhe koha nuk mund të ishte më perfekte. Robotaxi-t po shtohen, robotët humanoidë po marrin investime marramendëse dhe çdo kompani po kërkon sensorë më inteligjentë. Pra ndërsa ne ende grindemi me kamerën e telefonit që na e nxjerr fytyrën si në foto patente, robotët po marrin sy 3D me ngjyra ultra HD.