Dega e Bashkimi Demokratik për Integrim në Strugë ka reaguar kundër propozim-vendimit të Komunës së Struga për ndryshimin dhe plotësimin e Programit për rregullimin e tokës ndërtimore për vitin 2026, duke vlerësuar se rritja e tarifave komunale për ndërtim me rreth 20 për qind paraqet barrë shtesë për qytetarët dhe bizneset.

Në reagimin e saj, BDI-ja në Strugë thekson se tarifat e reja, që sipas tyre arrijnë deri në 5.500 denarë për metër katror në zonën urbane, krijojnë ngarkesë serioze për familjet dhe investitorët që planifikojnë të ndërtojnë. Sipas tyre, shqetësuese është edhe rritja e tarifave në zonat rurale, ku kompensimi për rregullimin e tokës ndërtimore është rritur nga 400 në 500 denarë për metër katror.

Nga kjo parti vlerësojnë se rritja e tarifave vjen në një kohë kur qytetarët ende përballen me mungesë të infrastrukturës bazë, përfshirë kanalizimin dhe shërbime të tjera elementare, si në disa lagje urbane ashtu edhe në shumicën e vendbanimeve rurale. Për këtë arsye, sipas tyre, rritja e çmimeve pa investime konkrete në përmirësimin e kushteve është e pajustifikueshme.

BDI-Strugë njofton se gjatë seancës së Këshillit Komunal janë paraqitur vërejtje dhe argumente kundër këtij vendimi, por sipas tyre ka munguar dialogu i mjaftueshëm dhe sqarimet e nevojshme, sidomos në mungesë të prezantimit nga sektori përkatës i urbanizmit.

Në reagim kërkohet rishqyrtim i vendimit, me më shumë transparencë dhe përfshirje publike në procesin vendimmarrës. “Qytetarët e Strugës meritojnë politika të balancuara, që mbështesin zhvillimin dhe mirëqenien e përgjithshme”, theksohet në reagim. Ky reagim vjen në kohën kur debati për kostot e ndërtimit dhe zhvillimin urban në Struga po bëhet gjithnjë e më i theksuar.