Kryeministri i Maqedonisë së Veriut, Hristijan Mickoski, tha se procesi i integrimit në Bashkimin Evropian po ndikohet nga kushte bilaterale.

Duke folur në Vjenë, ai tha se vendi përballet me presion nga një shtet anëtar i BE-së dhe kërkoi garanci për identitetin maqedonas përpara çdo ndryshimi kushtetues.

Mickoski u shpreh se qeveria është e gatshme për dialog me fqinjët, por kërkon siguri se nuk do të vendosen kërkesa të reja që prekin gjuhën dhe identitetin.

Ai paralajmëroi se procesi i zgjatur ka rritur frustrimin te qytetarët dhe ka bërë të pasigurt rrugën evropiane të vendit.

Mosmarrëveshjet me Bullgarinë mbeten pengesa kryesore për avancimin në negociata.

Sofja kërkon përfshirjen e bullgarëve në Kushtetutë, ndërsa Shkupi kërkon garanci se kjo nuk do të pasohet nga kushte të tjera.