Në organizim të organizatës sportive “Rrjeta e Yjeve”, në palestrën sportive në Ivanidoll do të mbahet një turne në volejboll, që pritet të mbledhë sportdashës të grupmoshave të ndryshme.
Kryetari i kësaj organizate, Abdulla Dauti, njofton se turneu do të zhvillohet për katër net radhazi, duke filluar nga data 19 prill në ora 18:00. Në këtë aktivitet sportiv do të marrin pjesë gjithsej 8 ekipe, të ndara në dy grupe, të cilat do të garojnë për një vend në fazat finale.

Dauti bëri të ditur gjithashtu se për ekipet më të suksesshme nuk do të mungojnë as shpërblimet, duke shtuar se qëllimi i këtij turneu është promovimi i sportit dhe krijimi i një atmosfere konkurruese dhe argëtuese për të gjithë sportdashësit.