Komisioni Rregullator i Energjetikës ka marrë vendim për ulje minimale të çmimeve të karburanteve, me një mesatare prej 2,73 për qind. Sipas këtij vendimi, benzina dhe dizeli do të shiten me çmime më të ulëta nga mesnata.
Sipas njoftimit të Komisionit:

Euro Super BS-95 ulet për 1,5 denarë

Euro Super BS-98 ulet për 1,5 denarë

Eurodizeli ulet për 2,5 denarë

Vaji ekstra i lehtë për amvisëri ulet për 3,5 denarë

Mazuti ulet për 2 denarë për kilogram

Këto janë çmimet maksimale të lejuara, ndërsa kompanitë mund të vendosin të shesin edhe me çmime më të ulëta. Zbritja nga OKTA pritet të zgjasë deri në fund të këtij muaji, duke u mundësuar kompanive që furnizohen prej saj të ofrojnë benzinën deri në dy denarë më lirë dhe dizelin deri në tre denarë më lirë se çmimi maksimal.
Në ndërkohë, lidhur me çmimet e ushqimeve, të cilat ndikohen drejtpërdrejt nga lëvizjet e çmimeve të karburanteve, kryeministri Hristijan Mickoski deklaroi se gjatë ditës pritet të merret raporti përkatës, i cili do të analizohet me kujdes përpara se të ndërmerren masa konkrete.
“Pres ta marr raportin dhe ta analizojmë këto ditë, dhe pasi ta shqyrtojmë me kujdes, do të dalim me masa të caktuara, të cilat synojmë të jenë të targetuara”, u shpreh Mickoski.
Ai gjithashtu njoftoi se nuk do ta drejtojë mbledhjen e sotme të Qeverisë për shkak të angazhimeve të tjera.