Hezbollahu po synonte disa zona në Izraelin verior, duke lëshuar një breshëri raketash mbi qytetet pranë kufirit me Libanin të mërkurën.

Qyteti i Kiryat Shmona u shënjestrua dy herë, së pari në orën 08:00 sipas kohës lokale, dhe pastaj përsëri në orën 08:55.

Zona të tjera në Izraelin verior të shënjestruara nga grupi i armatosur musliman shiit i mbështetur nga Irani përfshijnë Metula, Kfar Giladi, Dovev, Shlomi, Metzuba, Ya'ara, Avdon, Kfar Vradim, Nahariya dhe Shavei Zion.

Në një përditësim në Telegram, Hezbollahu ka thënë se sulmet ndaj Izraelit "do të vazhdojnë derisa të ndalet agresioni izraelito-amerikan kundër vendit dhe popullit tonë".

Hezbollahu ka dalë nga milicitë shiite të formuara për t'i rezistuar Izraelit pas pushtimit të Libanit jugor në vitin 1982, gjatë luftës civile të Libanit 1975-1990. Ai ka mbështetje të fortë nga Irani dhe kundërshton të drejtën e Izraelit për të ekzistuar. 

Ai konsiderohet një organizatë terroriste nga Izraeli dhe shumë vende të tjera, përfshirë Mbretërinë e Bashkuar dhe SHBA-në.

Sulmet e reja të së mërkurës vijnë vetëm një ditë pas bisedimeve Izrael-Liban në Washington, me ndërmjetësimin e sekretarit amerikan të Shtetit, Marco Rubio.

Pala izraelite i ka vlerësuar si pozitive bisedimet ndërkaq Hezbollahu kishte deklaruar para takimit, se as nuk përfaqëson në bisedime dhe as nuk do të pranojë asnjë marrëveshje të dalë nga to.