Edhe në çastet e fundit të jetës, Mircea Lucescu nuk reshti së menduari për futbollin. Pas ndarjes së tij nga jeta, kanë dalë në dritë detaje prekëse që dëshmojnë lidhjen e fortë të trajnerit rumun me lojën dhe garën.

Gazetari Horia Ivanovici ka zbuluar se Lucescu ishte ende plotësisht i përfshirë në zhvillimet sportive, madje deri në momentet e fundit. Sipas tij, trajneri e priste me entuziazëm sfidën e Rumanisë ndaj Turqisë: “Po përgatitesha për ndeshjen kundër Turqisë. E prisja me padurim dhe isha i bindur se do të kualifikoheshim”, kishte thënë Lucescu, duke reflektuar pasionin e tij të pandryshuar për futbollin.

Ivanovici ka ndarë edhe një moment tepër emocional nga një bisedë telefonike pak para infarktit: “Nuk ka rëndësi, do të kem kohë të pushoj”. Një fjali që sot merr një kuptim edhe më të thellë dhe prekës.

I vetëdijshëm për përkeqësimin e shëndetit në vitet e fundit, Lucescu kishte shprehur edhe një reflektim të hidhur për jetën: “Plakja nuk është e drejtë”.

Këto dëshmi tregojnë jo vetëm njeriun, por mbi të gjitha profesionistin e madh, i cili jetoi për futbollin deri në frymën e fundit.