Nënkryetari i  BDI-së, Arbër Ademi, ka deklaruar mbështetje të hapur për protestën e paralajmëruar nga studentët për të hënën, më 6 prill, duke e cilësuar atë si një reagim të drejtë ndaj kërkesave legjitime.

“Studentët po protestojnë për të drejtën e tyre, dhe kjo është një shenjë e nevojshme për të kërkuar zbatim të ligjit dhe drejtësi,” tha Ademi, duke theksuar shqetësimin për situatën aktuale në arsimin e lartë.

Ai nënvizoi kontradiktën mes njohurive teorike në auditor dhe realitetit praktik: “Si profesor i tyre, më dhimbset që studentët që i mësojmë për drejtësi dhe ligj, sot duhet të dalin në rrugë për të kërkuar të njëjtën drejtësi.”

Ademi lidh mbështetjen e tij edhe me përgjegjësinë personale si prind: “Si baba i dy fëmijëve që nesër do të jenë studentë, nuk mund të jem indiferent. Ajo që ndodh sot me studentët, mund t’u ndodhë nesër fëmijëve tanë.”

Ai përfundoi mesazhin me një apel për angazhim kundër padrejtësive: “Si qytetar, nuk mund të hesht përballë padrejtësisë. Do të jem në krah të studentëve, sepse ata po kërkojnë vetëm atë që u takon: drejtësi.”