Në çdo episod të “Top Tech” me Mateo Kadriun zbulojmë të rejat më të fundit nga bota e madhe e teknologjisë. Me informacione dhe gjithçka të detajuar rreth risive dhe mundësive që po na ofrohen çdo ditë sidomos nga Inteligjenca Artificiale me avancimin e projekteve nga më të ndryshme.

Nëse taksisti në Tiranë flet shumë… prit kur të mos flasë fare. Sepse po vjen një epokë ku makina nuk të pyet “nga je vlla”, por thjesht të çon në destinacion — dhe ka shumë gjasa të mos të gjykojë as për rrugën që zgjodhe në jetë.

Një startup që quhet Verne nga Kroacia, i drejtuar nga Mate Rimac, po hyn seriozisht në lojën e robotaksive. Në partneritetin më të ri me Uber dhe kompaninë e makinave autonome Pony.ai, ata planifikojnë të nisin një shërbim robotaksish në Europë, duke filluar nga Kroacia.

Ideja është e thjeshtë, por ambicioze: ti hap aplikacionin, thërret makinën dhe… nuk ke më debat për “sa bëhet me taximeter apo pa taximeter”. Pony.ai sjell teknologjinë, Uber sjell klientët, dhe kompania e Rimac — Verne — menaxhon gjithë operacionin. Pra një lloj “dream team”, ku secili bën atë që di më mirë.

Testimet kanë nisur dhe plani është që ky shërbim të rritet në shtete të tjera në vitet e ardhshme. Ndërkohë, Rimac — njeriu që bëri supermakina 2 milionë dollarëshe — tani po fokusohet tek diçka shumë më “popullore”: makina që të çon në shtëpi pa dramë.

Dhe këtu është pjesa interesante: ai beson që e ardhmja nuk është që ne të blejmë makina, por thjesht t’i përdorim kur na duhen. Pra nga “kjo është makina ime” kalojmë në “kjo është makina jonë… e aplikacionit”.

Një gjë është e sigurt: loja sapo është bërë serioze… dhe këtë herë po fillon nga Kroacia, jo nga Silicon Valley.