Lideri i BDI-së, Ali Ahmeti, së bashku me bashkëpunëtorë dhe bashkëveprimtarë, ka bërë homazhe në varrezat e dëshmorëve në fshatin Prilep të Deçan, një vend që simbolizon kujtesën, sakrificën dhe dinjitetin kombëtar.
Gjatë kësaj vizite, Ahmeti ka kujtuar edhe dëshmorin Shpend Mazrekaj, ushtar lirie nga Prilepi i Deçanit, i cili ra dëshmor gjatë luftës në Maqedoni. Sipas tij, Mazrekaj mbetet dëshmori i parë i rënë nga viset shqiptare jashtë Maqedonisë, duke simbolizuar unitetin e idealit kombëtar për liri dhe barazi.
Ahmeti theksoi se nderimi për dëshmorët nuk është vetëm një akt kujtese për të kaluarën, por edhe një përgjegjësi për të ardhmen. Ai u shpreh se sakrifica e tyre obligon të gjithë që të vazhdojnë rrugën me përkushtim, duke ruajtur dhe çuar përpara vlerat për të cilat ata dhanë gjithçka.