Partia opozitare BDI sot ka drejtuar kritika ndaj institucionit publik, Regjistri Qendror, të ketë bërë 40 “avancime” të reja në vende pune, nga të cilat thotë se nuk është përfshirë asnjë shqiptarë.
“Bashkimi Demokratik për Integrim e konsideron këtë zhvillim si një shkelje të rëndë të parimit të përfaqësimit të drejtë dhe një alarm serioz për mënyrën se si po trajtohen shqiptarët në institucionet shtetërore. Në një institucion publik ku janë realizuar 40 avancime, fakti që asnjë shqiptar nuk është avancuar tregon qartë se përfaqësimi nuk është më standard, por është bërë përjashtim”, tha BDI sot në një komunikatë.
Partia opozitare nuk sqaroi në komunikatë se për cilën periudhë të këtyre avancimeve është fjala në Regjistrin Qendror.
BDI për këto “avancime” e hodhi fajin në këtë rast tek VLEN, si parti qeverisëse.
“VLEN-i, si pjesë e qeverisë, mban përgjegjësi të drejtpërdrejtë për këtë gjendje. Ndërkohë që të drejtat e shqiptarëve duhet të mbrohen, ata kanë zgjedhur të heshtin, » shkruan BDI, duke kërkuar « sqarim të menjëhershëm për kriteret dhe procedurat e këtyre avancimeve, si dhe marrjen e masave konkrete për të garantuar përfaqësim të drejtë dhe të barabartë.
“Shqiptarët nuk mund të trajtohen si të padukshëm në institucionet e këtij shteti, » thotë në komunikatë BDI-ja.