Me rastin e 30-vjetorit të themelimit të TV Festa, ju urojmë përvjetorin dhe kujtojmë fillimet e para të mediave lokale në një kohë kur shqiptarët nuk kishin mundësi të informoheshin në gjuhën shqipe. Ju morët mbi vete një obligim të madh për të hapur TV Festën, me një qëllim kombëtar dhe aspak financiar.

Për herë të parë, nxënësit shqiptarë të shkollave fillore të atij rajoni patën mundësinë që, nëpërmjet ekranit tuaj, të shprehin talentin e tyre. Banorët e fshatrave shqiptare patën mundësi të flasin për problemet infrastrukturore, por edhe për problemet individuale që kishin në vitet ’90. Bartësit e politikës shqiptare shprehën qëndrimet dhe ofertat e tyre politike për qytetarët nëpërmjet medias suaj.

I gjithë investimi në media ishte përkushtim dhe mision, pa pasur interes financiar. E gjithë kjo u bë me qëllim që të ndihmohen banorët shqiptarë në rajone të ndryshme, nga Kumanova e deri në Strugë. Ju, si media, keni dhënë një kontribut të veçantë për rajonin e Karadakut, edhe gjatë luftës së Kosovës, si dhe gjatë konfliktit në Maqedoni, në veçanti në komunën e Likovës. Edhe pse pa mbështetje, ju vazhduat t’u mbijetoni krizave të ndryshme gjatë gjithë kësaj kohe.

Sot, kur shumica, në kohën e internetit dhe rrjeteve sociale, kanë mundësi të paraqesin qëndrimet e tyre, nuk duhet harruar roli i mediumit tuaj në Kumanovë dhe më gjerë, duke pasur parasysh se keni rrezikuar shumë për të informuar për gjendjen reale, kur nuk kishte mundësi tjetër. Edhe sot vazhdoni të jeni një medium që kontribuon në çdo sferë në rajonin e Kumanovës.

Me rastin e 30-vjetorit të themelimit të TV Festa, ekipi i TV Uskana Kërçovë ju uron për këtë përvjetor, duke ju falënderuar për bashkëpunimin shumëvjeçar dhe duke ju dëshiruar shumë suksese në të ardhmen.

Me respekt,

Munir Mehdiu

TV Uskana Kërçovë