Shoqata e Veteranëve të Luftës së Ushtrisë Çlirimtare Kombëtare (SHVL-UÇK) ka dërguar një telegram përshëndetës për Këshillin Organizues të Manifestimit Tradicional të 14 Marsit, duke nderuar sakrificën dhe qëndresën e luftëtarëve dhe dëshmorëve të luftës së vitit 2001.

Në mesazhin e saj, SHVL-UÇK shpreh respekt dhe mirënjohje për familjet e dëshmorëve dhe martirëve, për të plagosurit e lirisë, për përfaqësuesit e Shtabit të Përgjithshëm si dhe për të gjithë përkrahësit e çështjes kombëtare ndër vite.

Sipas telegramit, pranvera e vitit 2001 përbën një nga periudhat më të rëndësishme të qëndresës dhe sakrificës për liri në viset shqiptare nën Maqedoni. Në atë kohë, ndërkohë që zhvilloheshin aktivitete përkujtimore dhe organizime të ndryshme, forcat policore të regjimit ushtronin dhunë dhe represion ndaj qytetarëve shqiptarë në shumë zona, nga Malësia e Shkupit deri në Malësinë e Tetovës.

Pavarësisht rrethanave të vështira, në këto aktivitete morën pjesë bashkëveprimtarë nga mërgimi dhe nga trevat shqiptare, ndërsa theksohet kontributi i pasuesve të veprimtarit Rafi Halili, të udhëhequr nga Kastriot Haxhi-Rexha me bashkëluftëtarët e tij.

Në telegram përmendet gjithashtu mbështetja e rinisë shqiptare, veçanërisht e studentëve të Universitetit të Tetovës, si dhe ardhja nga mërgimi e luftëtarëve që iu bashkuan radhëve të UÇK-së gjatë zhvillimeve të pranverës së vitit 2001.

SHVL-UÇK rikujton edhe betejat dhe ngjarjet e asaj periudhe, ku disa nga luftëtarët ranë dëshmorë, ndërsa përmendet edhe përballja në zonën e Gurit të Kuq, e cilësuar si një nga epopetë e para të luftës.

Në telegram theksohet gjithashtu roli i fshatrave të rajonit, ku Sellca përshkruhet si “Kështjella e UÇK-së” për shkak të mbështetjes së banorëve për luftëtarët, ndërsa Shipkovica përmendet si një nga vendet ku përfaqësuesit e Shtabit të Përgjithshëm gjetën strehim gjatë periudhës së luftës.

Sipas SHVL-UÇK-së, në kuadër të manifestimit të 14 Marsit nderohen 25 dëshmorë të rënë për atdhe, për kombin, flamurin, gjuhën dhe identitetin.

Në përfundim të telegramit, organizata thekson se lufta për liri ishte autoktone dhe e mbështetur në idealin kombëtar, duke kujtuar se luftëtarët niseshin në beteja me moton “Liri ose Vdekje” dhe me përkushtim ndaj atdheut.

SHVL-UÇK nga mërgimi premton se do të vazhdojë të ruajë dhe të përcjellë kujtimet dhe dëshmitë e kësaj periudhe për brezat e ardhshëm, ndërsa u uron suksese pjesëmarrësve të manifestimit dhe familjeve të dëshmorëve.

Telegrami përmbyllet me mesazhin: “Lavdi e përjetshme Dëshmorëve të Kombit.”