Pas akuzave për shkurtim të mjeteve për Korridorin 8 dhe largimin nga puna të punëtorëve, Qeveria e Maqedonisë së Veriut mohoi se ka shkurtim të fondeve, ndërsa për çështjet kadrovike përgjegjësinë e hedhin te konsorciumi ‘Bechtel&Enka’ të cilët heshtën, shkruan Portalb.mk.

Nga Qeveria për Portalb.mk thanë se mjetet e parashikuara për konsorciumin Bechtel&Enka nuk janë zvogëluar dhe se gjithçka që është realizuar deri më tani është paguar, ndërsa sipas kontratës, gjithçka që do të realizohet në periudhën e ardhshme do të paguhet gjithashtu në mënyrë përkatëse.

“Realizimi i projektit për ndërtimin e Korridorit 8 po zhvillohet sipas dinamikës së përcaktuar dhe nuk ka devijime nga plani i parashikuar. Sa i përket informacioneve për largimin e punëtorëve nga puna, duke qenë se bëhet fjalë për çështje kadrovike të realizuesit, për detaje konkrete ju drejtojmë të kontaktoni drejtpërdrejt me konsorciumin Bechtel & Enka”, thanë nga Qeveria.

Për zhvillimet e fundit është e njoftuar edhe Ambasada e SHBA-ve në vend.

“Jemi të vetëdijshëm për zhvillimet e fundit. Meqenëse kjo ka të bëjë me vendime të brendshme operacionale të një kompanie private, ju referojmë te Bechtel për informacionin më të saktë lidhur me projektin e Korridorit 8”, thanë nga Ambasada e SHBA-ve për Portalb.mk.

Megjithatë, nga Bechtel&Enka deri në publikimin e këtij teksti nuk janë përgjigjur në pyetjet gazetareske të Portalb.mk për largimin nga puna të rreth 50 punëtorëve dhe dinamikën e projektit.

Kujtojmë se para dy ditëve kryetari i Aleancës për Shqiptarët, Ziadin Sela ka thënë se Qeveria po mundohet të ndalojë punimet në Korridorin 8.

Ndërsa deputetja e BDI-së, Rina Ajdari tha se shkurtim të mjeteve financiare për Korridorin 8 dhe 10d ka pasur që në buxhetin e votuar për vitin 2026.

Në opinion alarmi është ngritur edhe për largimin nga puna të rreth 50 punëtorëve të angazhuar në ndërtimin e Korridorit 8. Punëtorët janë ankuar se janë larguar nga puna pa paralajmërim paraprak, edhe pse, siç thonë, kanë kontrata të vlefshme. Si arsyetim për largimet ata thonë se u është thënë se shteti nuk ka transferuar fonde për projektin në të cilin kompania punon.

Në ndërkohë nga Bechtel dhe Enka para disa ditëve për MIA kanë deklaruar se projekti vazhdon të shënojë përparim të mirë dhe konfirmojnë se të gjitha faturat janë paguar plotësisht nga Qeveria.