Shtëpia e pop yllit Rihanna në Beverly Hills u bë objekt i të shtënave me armë të dielën, sipas Policisë së Los Anxhelosit.

Ngjarja ndodhi rreth orës 13:15 me kohën lokale, kur një grua në të 30-at ndaloi me makinë pranë rezidencës dhe qëlloi shtatë herë para se të largohej me shpejtësi. Automjeti i saj u gjet rreth 12 km larg vendngjarjes dhe gruaja u vu nën arrest. Në vendin e ngjarjes policia gjeti fishekë të armës sulmuese, por fatmirësisht askush nuk u lëndua, përfshirë edhe vetë Rihannën, e cila ndodhej në shtëpi gjatë incidentit.

Rihanna, 37-vjeçe dhe e lindur Robyn Fenty, ka tre fëmijë me partnerin e saj, reperin A$AP Rocky – një vajzë e sapolindur dhe dy djem, Riot dhe RZA. Çifti njoftoi shtatzëninë e fundit gjatë Met Galas të vitit të kaluar, shkruan BBC.

Incidenti me armë vjen pas një serie ngjarjesh ligjore që përfshinin partnerin e saj A$AP Rocky, i cili u shpall i pafajshëm për përdorim armësh ndaj një miku të mëparshëm në shkurt të vitit 2025, gjatë një gjyqi ku Rihanna kishte ardhur me dy djemtë e saj në gjykatë. Përfaqësuesit e Rihannës nuk kanë bërë ende komente për ngjarjen e fundit.