Senati nuk e votoi Rezolutën për kufizimin e autoriteteve ushtarake të presidentit amerikan Donald Trump në konfliktin me Iranin.

Rezoluta, e cila kërkonte ndërprerjen e të gjitha armiqësive ndaj Iranit që nuk ishin miratuar nga Kongresi, u propozua nga senatori demokrat Tim Kaine. 53 senatorë votuan “kundër” iniciativës së tij, ndërsa 47 ishin “pro”.

I vetmi demokrat që votoi kundër ishte senatori i Pensilvanisë, John Fetterman, ndërsa pro rezolutës (nga radhët e republikanëve) votoi senatori i Kentakit, Rand Paul.

“Donald Trump e ka futur Amerikën në një konflikt pa qëllime të qarta, pa plan dhe pa autorizim nga Kongresi,” deklaroi para votimit udhëheqësi i demokratëve në Senat, Chuck Schumer.

Historiku i autoriteteve ushtarake

Kongresi ka kompetencat për shpalljen e luftës, por Rezoluta për Fuqitë e Luftës u përdor për herë të parë si përgjigje ndaj Luftës së Vietnamit në vitin 1973. Ajo i mundëson presidentit të ndërmarrë ndërhyrje ushtarake të kufizuara për t’iu përgjigjur një kërcënimi të menjëhershëm ndaj SHBA-së.

Demokratët pretendojnë se në rastin e Iranit nuk kishte asnjë kërcënim të menjëhershëm për vendin.

Rezoluta do të votohet sot edhe në Dhomën e Përfaqësuesve, ku për shkak të shumicës republikane, pritet një rezultat i ngjashëm.(INA)