Banorët e fshatrave të ish-Komunës së Osllomesë kanë dalë sot në protestë kundër hedhjes së mbeturinave që vijnë nga pastrimi i shtratit të lumit të Zajazit, të cilat po depozitohen në gropat e minierës së Osllomesë nga Komuna e Kërçovës.
Që në orët e para të mëngjesit, banorët janë organizuar për të ndaluar kamionët me mbeturina që drejtohen drejt kësaj zone. Ata shprehen të shqetësuar për ndikimin që mund të kenë këto mbeturina në mjedis dhe në shëndetin e tyre.
Protestuesit kërkojnë nga Komuna e Kërçovës dhe nga TEC-i i Osllomesë që të ndërpresin menjëherë hedhjen e mbeturinave në këtë hapësirë, duke theksuar se zona është pranë vendbanimeve dhe çdo ndotje përbën rrezik serioz për ta.
Banorët paralajmëruan se do të vazhdojnë me kundërshtimet e tyre nëse institucionet nuk reflektojnë .