Gjermania i dhuroi Maqedonisë së Veriut automjete dhe pajisje në vlerë prej 600 mijë eurosh për forcimin e kapaciteteve të Ministrisë së Brendshme. Donacioni përfshin automjete, kamera termike, pajisje kompjuterike, softuer dhe mjete speciale për njësinë e aviacionit, me qëllim përmirësimin e menaxhimit të kufijve dhe luftës kundër krimit të organizuar. Ministri Pançe Toshkovski tha se mbështetja është dëshmi e partneritetit të fortë mes dy vendeve, ndërsa ambasadorja Petra Drexler theksoi se bashkëpunimi kontribuon në sigurinë e përbashkët evropiane, transmeton Portalb.mk.

Këto pajisje kanë për qëllim përmirësimin e kapaciteteve të Ministrisë në fushën e menaxhimit të kufijve, luftës kundër trafikimit të qenieve njerëzore dhe kontrabandës së migrantëve, analizës së inteligjencës kriminale dhe ekzaminimeve mjeko-ligjore.

Ministri Toshkovski theksoi se donacioni është simbol i besimit dhe partneritetit të fortë midis dy vendeve.

“Kjo ceremoni nuk është vetëm dorëzim formal i pajisjeve, por një mesazh i qartë se Gjermania qëndron krah për krah me Maqedoninë në luftën e përbashkët kundër krimit të organizuar, në mbrojtjen e kufijve tanë dhe në sigurimin e sigurisë së qytetarëve. Mbështetja që marrim nuk matet vetëm në burime materiale, por edhe në njohuri, trajnime dhe shkëmbim përvojash, që do të thotë forcim afatgjatë i kapaciteteve dhe profesionalizim i policisë maqedonase”, theksoi Toshkovski.

Ai shprehu mirënjohje për Policinë Federale të Republikës Federale të Gjermanisë dhe Ambasadën e Gjermanisë në Shkup për mbështetjen e tyre të vazhdueshme, duke theksuar se gjashtë trajnimet e zbatuara për zyrtarët e policisë së Maqedonisë janë provë e bashkëpunimit strategjik dhe afatgjatë midis dy institucioneve.

Ministri theksoi se një ndihmë e tillë përfaqëson kontribut të rëndësishëm në forcimin e kapaciteteve institucionale dhe përmirësimin e sigurisë, si dhe në realizimin e vizionit të përbashkët për një Maqedoni të sigurt, të qëndrueshme dhe evropiane.

Gjermania i dhuro Policisë së Maqedonisë automjete dhe pajisje në vlerë prej 600 mijë eurosh. Foto: MPB

“Duke ofruar pajisje teknike, ne vazhdojmë bashkëpunimin tonë policor të besueshëm dhe afatgjatë. Forcimi i kapaciteteve të Maqedonisë së Veriut në mbikëqyrjen e kufijve, në luftën kundër trafikimit të qenieve njerëzore, migrimit të paligjshëm dhe krimit ndërkufitar është në interesin tonë të përbashkët evropian. Së bashku punojmë për të forcuar Evropën – sot dhe në të ardhmen”, tha ambasadorja Drexler.

Kujtojmë se edhe ambasadorja e SHBA-së, Nicole Varnes solli një robot për deaktivizimin e bombave, duke përfshirë pajisje shumë të sofistikuara, me vlerë rreth një milion euro, si grant për Ministrinë e Brendshme, përkatësisht Njësinë e zbulimit dhe demontimin e municioneve shpërthyese.