Udhëheqësi i Koresë së Veriut, Kim Jong Un, mendohet se ka zgjedhur vajzën e tij si pasuesen e tij të mundshme, sipas Agjencisë Kombëtare të Inteligjencës së Koresë së Jugut (NIS).

Sipas vlerësimit të NIS, Kim Ju Ae, vajza e liderit koreano-verior, ka rritur ndjeshëm praninë e saj në evente zyrtare shtetërore, gjë që konsiderohet si tregues i mundshëm i rolit të saj në të ardhmen politike të vendit. Agjencia tha se analiza është bazuar në një “sërë rrethanash”, përfshirë shfaqjet e saj gjithnjë e më të shpeshta në aktivitete publike dhe shtetërore.

Deputeti Lee Seong-kwen deklaroi se Ju Ae, e cila më herët ishte përshkruar si duke u “trajnuar” për rolin e pasardhëses, tashmë duket se ka hyrë në fazën e “përcaktimit si trashëgimtare”. Ai theksoi se ajo ka marrë pjesë në disa ngjarje të rëndësishme, si përvjetori i themelimit të Ushtrisë Popullore Koreane dhe vizitat në monumente shtetërore simbolike, ndërsa ka shfaqur edhe shenja përfshirjeje në diskutime mbi politikat shtetërore.

Agjencia jugkoreane e inteligjencës pritet gjithashtu të monitorojë nëse Ju Ae do të marrë pjesë në Kongresin e ardhshëm të Partisë së Punës së Koresë, një nga ngjarjet politike më të rëndësishme në vend, i cili zhvillohet çdo pesë vjet dhe ku përcaktohen prioritetet strategjike, përfshirë politikën e jashtme dhe ambiciet bërthamore.

Kim Ju Ae, 13 vjeç dhe është fëmija i vetëm i njohur publikisht i Kim Jong Un dhe bashkëshortes së tij, Ri Sol Ju.

NIS vlerëson se lideri koreano-verior mund të ketë edhe një djalë më të madh, por ekzistenca e tij nuk është konfirmuar zyrtarisht.

Prania publike e Ju Ae u bë e njohur për herë të parë në vitin 2013, kur ish-basketbollisti amerikan Dennis Rodman deklaroi për gazetën britanike The Guardian se kishte takuar dhe mbajtur në krahë foshnjën gjatë një vizite në Korenë e Veriut. Ajo u shfaq për herë të parë në televizionin shtetëror në vitin 2022, gjatë inspektimit të një rakete balistike ndërkontinentale.

Që prej asaj kohe, Ju Ae është parë shpesh në media shtetërore pranë babait të saj, përfshirë edhe në një vizitë në Pekin gjatë një parade ushtarake madhore. Analistët vlerësojnë se paraqitja e saj publike ka ndihmuar në zbutjen e imazhit të liderit koreano-verior.

Megjithatë, mundësia që një vajzë të zgjidhet si pasardhëse ka ngritur pikëpyetje, duke marrë parasysh strukturën tradicionale patriarkale të shoqërisë koreano-veriore.

Disa ekspertë theksojnë se precedenti i motrës së Kim Jong Un, Kim Yo Jong, e cila mban një rol të rëndësishëm politik, tregon se gratë mund të kenë ndikim në hierarkinë e pushtetit.

Gjithashtu mbetet e paqartë pse lideri aktual, i cili konsiderohet relativisht i ri dhe në gjendje të mirë shëndetësore, do të përcaktonte që tani një pasardhëse kaq të re. Analistët theksojnë se ende nuk dihet se çfarë ndryshimesh mund të sjellë në të ardhmen një tranzicion i mundshëm i pushtetit.

/tvklan.al