Nga LSM njoftuan se bllokadat do të vazhdojnë më 12 shkurt me bllokimin e Odës Ekonomike, Lidhjes së Odave Ekonomike dhe Organizatës së Punëdhënësve, ndërsa më 17 shkurt në shënjestër do të jetë Qeveria

Anëmsha SHABANI

Shkup, 10 shkurt – Punëtorët e udhëhequr nga Lidhja e Sindikatave të Maqedonisë (LSM) protestuan sot para Kuvendit në Shkup, duke bllokuar hyrjet kryesore dhe qarkullimin në rrugët “Dame Gruev” dhe “11 Tetori”. Protesta u organizua me kërkesë për rritjen e pagës minimale në 600 euro dhe rritjen e të gjitha pagave të tjera me të paktën 100 euro, në kushtet e rritjes së vazhdueshme të kostos së jetesës dhe rënies së standardit të punëtorëve. Para fillimit të protestës, kryetari i LSM-së, Sllobodan Trendafilov, iu drejtua të pranishmëve me një mesazh simbolik, duke përjashtuar deputetët nga përshëndetja e tij. Ai sqaroi se ky qëndrim lidhet me faktin se deputetët kanë bllokuar propozimin e sindikatave për rritjen e pagave për dy vitet e ardhshme, ndërkohë që nuk kanë hezituar të përfitojnë nga mekanizmat ligjorë për rritjen e pagave të tyre personale. “Mirëmëngjesi të gjithëve, përveç deputetëve”, deklaroi Trendafilov.

Siç ishte paralajmëruar, punëtorët tentuan të bllokonin hyrjen e automjeteve drejt Kuvendit, por sipas Trendafilovit, një pjesë e deputetëve mbërritën herët në mëngjes për t’iu shmangur përballjes me protestuesit. “Sot po bllokojmë 21 persona në dy lokacione që të mos vijnë me automjetet e tyre dhe të mos mbledhin shpenzime udhëtimi. Informacioni ynë është se shumë deputetë u zgjuan herët për të ardhur para orës nëntë, vetëm që të mos përballen me punëtorët, sepse turpërohen prej tyre”, tha Trendafilov. Ai akuzoi deputetët për standarde të dyfishta, duke theksuar se ndërkohë që refuzojnë rritjen e pagave të punëtorëve, përgatiten për rritje të ndjeshme të pagave të tyre. Sipas Trendafilovit, paga e deputetëve pritet të rritet jo vetëm me 9.2 për qind, sa është rritja e pagës mesatare, por edhe me 12.6 për qind shtesë, nëse Gjykata Kushtetuese shfuqizon dekretin e Qeverisë, çka do të sillte një rritje totale deri në 21 për qind për deputetët me paga mbi 100 mijë denarë.

Ndërkohë, Trendafilov theksoi se bllokada para Parlamentit do të zgjasë deri në orën 11:00, kur është planifikuar fillimi i seancës parlamentare, duke kërkuar që deputetët të propozojnë dhe të votojnë menjëherë rritjen e pagës minimale në 600 euro dhe rritjen e pagave të të gjithë punëtorëve me të paktën 6.000 denarë, ose diferencën mes pagës minimale të vjetër dhe asaj të re. Në të kundërtën, ai paralajmëroi mbledhjen e 10.000 nënshkrimeve dhe dorëzimin e një iniciative për uljen e pagave të deputetëve dhe zyrtarëve.

Duke folur për iniciativën e mëparshme të LSM-së për uljen e pagave të deputetëve me 80 për qind, Trendafilov tha se ajo u cilësua si antikushtetuese vetëm sepse do t’i zbriste pagat e tyre në nivelin e pagës minimale. “Ata e kuptuan sa e vështirë është të jetosh me pagë minimale, prandaj e quajnë antikushtetuese këtë iniciativë, ndërsa uljen simbolike të koeficienteve të tyre e konsiderojnë të pranueshme”, deklaroi ai.

Protestës iu bashkua edhe nënkryetari i LSM-së, Ivan Peshevski, i cili deklaroi se disa deputetë mbërritën në Kuvend para orës 8 të mëngjesit, duke shmangur kontaktin me punëtorët. Ai theksoi se shpenzimet mujore të udhëtimit të deputetëve janë më të larta se paga minimale e një punëtori në sektorin privat dhe se për dy vjet kostoja e jetesës është rritur për rreth 9.000 denarë, gjë që sipas tij e bën kërkesën për pagë minimale 600 euro plotësisht të arsyeshme. “Nuk ka ekonomi dhe shtet pa punëtorë. Nëse duan një mandat tjetër, le t’i vendosin kërkesat tona në rend dite dhe le t’i votojnë. Nëse jo, ne do të jemi këtu çdo ditë dhe do të bllokojmë derisa të dëgjohet zëri i punëtorit”, shtoi Peshevski.

Ndryshe, nga LSM njoftuan se bllokadat do të vazhdojnë më 12 shkurt me bllokimin e Odës Ekonomike, Lidhjes së Odave Ekonomike dhe Organizatës së Punëdhënësve, ndërsa më 17 shkurt në shënjestër do të jetë Qeveria. Sindikata paralajmëroi gjithashtu se do të kërkojë informacion zyrtar nga Kuvendi për deputetët që do të kërkojnë rimbursim të shpenzimeve të udhëtimit për ditën e sotme. (koha.mk)