Çairi vazhdon të mbetet i fundit në listën e përfituesve të fondeve evropiane.
Në një kohë kur edhe komunat më të vogla rurale në gjithë vendin po përfitojnë miliona euro nga fondet e Bashkimit Evropian për rrugë, shkolla, ujësjellës dhe shërbime publike, Çairi vazhdon të mos përfitojë asgjë. Zero projekte. Zero fonde. Zero vizion.

Kjo nuk është rastësi. Kjo është pasojë direkte e mungesës së dijes, vullnetit dhe kapacitetit institucional të udhëheqjes aktuale të komunës për të dizajnuar projekte serioze dhe për t’i absorbuar fondet evropiane. Fondet ekzistojnë, thirrjet janë të hapura, por Çairi nuk është aty ku duhet – sepse nuk ka ekip, nuk ka strategji dhe nuk ka asnjë përgatitje profesionale.

Ndërkohë, qytetarëve të Çairit u shiten premtime boshë. Kredia hungareze u prezantua si zgjidhje magjike, por sot po shihet qartë se ishte një mashtrim parazgjedhor. Asnjë projekt konkret, asnjë investim real dhe asnjë përfitim për qytetarët. Vetëm propagandë.

E njëjta gjë po ndodh edhe me fondet qeveritare. Çairi po anashkalohet sistematikisht, pa projekte, pa mbështetje dhe pa zë në tryezat ku merren vendimet. Kjo po e thellon pabarazinë dhe po e lë komunën tonë jashtë çdo procesi zhvillimor.

Çairi nuk ka problem me mungesën e mundësive. Çairi ka problem me udhëheqjen që nuk di, nuk do dhe nuk guxon të punojë për interesin publik. Qytetarët e Çairit meritojnë zhvillim, investime dhe projekte evropiane, jo justifikime dhe mashtrime.

Është koha që kjo padrejtësi të marrë fund. Çairi nuk mund dhe nuk duhet të mbetet më komuna e fundit në Evropë.