Kryetari i Kuvendit, Afrim Gashi, gjatë vizitës së tij në Uashington, ka marrë pjesë në një panel diskutimi të organizuar nga Këshilli Atlantik, ku në fokus ishte integrimi ekonomik rajonal në Evropën Juglindore dhe perspektivat e bashkëpunimit ndërmjet vendeve të Ballkanit Perëndimor.

Gashi theksoi rëndësinë e rolit të Republikës së Maqedonisë së Veriut si faktor stabiliteti në rajon, duke nënvizuar nevojën për projekte infrastrukturore dhe forcimin e lidhjeve ekonomike mes vendeve fqinje. Sipas tij, integrimi dhe bashkëpunimi rajonal janë parakusht për zhvillim të qëndrueshëm dhe përparim drejt anëtarësimit në Bashkimin Evropian.

“Nënvizova pjekurinë dhe rolin e Republikës së Maqedonisë së Veriut si faktor stabiliteti në rajon, rëndësinë e projekteve infrastrukturore, si dhe nevojën për një integrim dhe bashkëpunimit rajonal ndërmjet vendeve të Ballkanit Perëndimor, si parakusht për zhvillim të qëndrueshëm dhe avancim drejt Bashkimit Europian,” ka deklaruar Gashi.

Ai gjithashtu shprehu mirënjohje ndaj Këshillit Atlantik për organizimin e panelit, duke e cilësuar atë si një platformë të rëndësishme dialogu për çështje strategjike që lidhen me zhvillimin ekonomik dhe integrimin evropian të rajonit.

Në kuadër të vizitës në SHBA, pritet që Gashi të zhvillojë edhe takime të tjera me përfaqësues institucionalë dhe ekspertë ndërkombëtarë, me fokus forcimin e bashkëpunimit dhe perspektivën euroatlantike të vendit.