Kina ka ekzekutuar katër anëtarë të familjes mafioze Bai, një nga dinastitë më famëkeqe që drejtonte qendra mashtrimi online në Myanmar.

Ata ishin pjesë e 21 anëtarëve dhe bashkëpunëtorëve të dënuar për mashtrim, vrasje, plagosje dhe krime të tjera. Pesë prej tyre ishin dënuar me vdekje, përfshirë patriarkun Bai Suocheng, i cili vdiq nga sëmundja pas dënimit.

Javën e kaluar, Kina ekzekutoi gjithashtu 11 anëtarë të familjes Ming, në kuadër të goditjes së gjerë ndaj rrjeteve të mashtrimit në Azinë Juglindore, që kanë prekur mijëra viktima kineze.

Për vite me radhë, familjet Bai, Ming dhe klane të tjera kontrolluan qytetin kufitar Laukkaing në Myanmar, ku drejtonin kazino, zona me drita të kuqe dhe operacione kibernetike. Familja Bai, e konsideruar “numri një” mes klaneve, kishte ngritur 41 komplekse ku mbizotëronin dhuna, torturat dhe shfrytëzimi.

Sipas gjykatës, aktivitetet e tyre çuan në vdekjen e gjashtë shtetasve kinezë, një vetëvrasje dhe shumë lëndime. Perandoritë kriminale u shembën në vitin 2023, pasi Pekini, i pakënaqur me mosveprimin e ushtrisë së Myanmarit, mbështeti në heshtje një ofensivë të kryengritësve etnikë që çoi në kapjen dhe dorëzimin e mafias tek autoritetet kineze.

Ekzekutimet e fundit shihen si një mesazh i fortë parandalues nga Pekini kundër mashtrimeve online, ndërsa OKB vlerëson se qindra mijëra njerëz janë trafikuar në rajon për të kryer këto krime, me viktima kryesisht kineze.