Në çdo episod të “Top Tech” me Mateo Kadriun zbulojmë të rejat më të fundit nga bota e madhe e teknologjisë. Me informacione dhe gjithçka të detajuar rreth risive dhe mundësive që po na ofrohen çdo ditë sidomos nga Inteligjenca Artificiale me avancimin e projekteve nga më të ndryshme.
Po sikur TikTok ta dijë moshën tënde më mirë se mamaja jote?
Kjo është pikërisht ajo që po vjen në Europë. TikTok ka njoftuar se në javët në vijim do të lançojë një teknologji të re për zbulimin e moshës së përdoruesve, nën presionin gjithnjë e më të fortë të rregullave europiane. Objektivi është i qartë: të identifikohen dhe të hiqen llogaritë e fëmijëve nën 13 vjeç.
Problemi real? Deri sot, kontrolli i moshës ka qenë pothuajse formal. Klikon “jam 13+” dhe vazhdon jetën. Tani jo më. Sistemi i ri analizon profilin, videot e publikuara dhe sjelljen në platformë për të kuptuar nëse një llogari duket “shumë e re”. Jo bllokim automatik, por shqyrtim nga moderatorë të specializuar.
Kjo vjen ndërsa Europa po shtrëngon vidën. Australia tashmë ka ndaluar rrjetet sociale për fëmijët nën 16 vjeç. Danimarka po kërkon ndalim per ata nen 15. Parlamenti Europian po shtyn për kufij të qartë moshe. Dhe pilotimi i këtij sistemi në Britani çoi në fshirjen e mijëra llogarive të fëmijëve.
Presioni nuk është vetëm politik. ByteDance, kompania mëmë e TikTok, po përballet edhe me padi serioze nga prindër që pretendojnë se algoritmi ka promovuar sfida të rrezikshme për fëmijët. Emra si “blackout challenge” nuk janë më thjesht lajme virale, por çështje gjyqësore.
TikTok thotë se nuk ka një mënyrë perfekte për të verifikuar moshën pa cenuar privatësinë. Për apelime, do përdoren mjete si vlerësimi i moshës nga fytyra dhe dokumente identifikimi, në bashkëpunim me rregullatorët europianë.
