Mbi 100 punime të realizuara mbi motive popullore dhe aplikime digjitale bashkëkohore janë ekspozuar në një nga auditorët e Universitetit të Shkodrës.

Këto krijime janë punuar nga studentët e vitit të dytë bachelor të Departamentit të Arteve, duke sjellë një ndërthurje mes traditës dhe qasjeve moderne në dizajnin tekstil. Kostumografia me motive popullore përbën tematiken kryesore të ekspozitës.

“Disa punime janë të bëra në mënyrën tradicionale me dorë por këtë vit kemi bërë diçka më ndryshe me aplikimin digjital”, u shpreh Uendi Selmani, Studente, UNISHK.

Ekspozita është realizuar nën drejtimin e pedagoges Prof. Erëmirë Jahja, e cila e vlerëson këtë aktivitet si një dëshmi konkrete të potencialit krijues dhe profesional të brezit të ri të dizajnerëve.

“Punoj çdo ditë me këto studentë dhe janë shumë të talentuar. Gjithmonë Shkodra sjellë dhe nxjerrë artistë”, tha Prof. Erëmirë Jahja, UNISHK.

Ekspozita “Textile Design” shërben gjithashtu si vlerësim semestral për studentët dhe dëshmon mënyrat se si trashëgimia tekstile mund të riformulohet dhe të përshtatet me kërkesat e dizajnit modern.

Gazetar: A.Hoti

/rtsh.al/