Trafiku i mallrave në pikat kufitare vazhdon të mbetet i bllokuar  për shkak të protestës së transportuesve nga Ballkani Perëndimor, transmeton Portalb.mk.

Ata, para katër ditësh, vendosën kamionë në pikat kufitare drejt vendeve të zonës Shengen, duke kërkuar që Bashkimi Evropian (BE) të ndryshojë rregullin për evidencën elektronike të qëndrimit të transportuesve në zonë.

Protesta është kundër zbatimit të sistemit EES për qëndrimin në zonën Shengen dhe rregullit 90/180 ditë, i cili, sipas tyre, po e paralizon punën e tyre.

Pavarësisht bllokimit të trafikut të mallrave në pikat drejt zonës Shengen, i cili sipas njoftimeve do të zgjasë të paktën shtatë ditë, trafiku i udhëtarëve funksionon pa pengesa.

Autoritetet në Maqedoninë e Veriut presin që problemi i transportuesve të tejkalohet, çështje e cila, siç thonë ata, është e hapur që nga shtatori me Komisionin Evropian (KE).

Sipas njoftimeve, Komisioni Evropian sot pritet të miratojë dy strategji të reja, njërën për vizat dhe tjetrën për migracionin dhe azilin.