Dhoma e Avokatëve e Republikës së Maqedonisë së Veriut ka reaguar zyrtarisht me shqetësim të thellë dhe indinjatë të plotë ndaj sulmit dhe kërcënimit serioz të ushtruar ndaj avokates Syarta Saliu-Osmani në qytetin e Kërçovës, duke e cilësuar këtë ngjarje si një akt të rëndë që cenon drejtpërdrejt sigurinë personale, profesionin e avokatisë dhe vetë rendin demokratik.
Zëvendëskryetarja e Dhomës së Avokatëve, avokatja M-r Hamdije Ademi Tafa, thekson se rasti është veçanërisht alarmant për faktin se avokatja Syarta Saliu-Osmani është edhe këshilltare komunale në Komunën e Kërçovës. Sipas saj, kjo rrethanë hap dyshime të arsyeshme se nuk bëhet fjalë vetëm për një akt kërcënimi individual, por edhe për presion, frikësim dhe intimidim me prapavijë politike.
“Çdo kërcënim ndaj një avokateje që ushtron detyrën e saj profesionale dhe publike është sulm ndaj shtetit të së drejtës, përfaqësimit demokratik dhe ndaj grave që marrin role aktive në jetën institucionale dhe politike,” thuhet në reagim.
Dhoma e Avokatëve e Republikës së Maqedonisë së Veriut dënon fuqishëm çdo formë dhune, kërcënimi dhe presioni ndaj avokatëve, veçanërisht kur këto akte ndodhin në rrethana që ngrenë dyshime për motivim politik. SipasDhomës së Avokatëve, askush nuk guxon të frikësojë përfaqësuesit e drejtësisë dhe të zgjedhurit lokalë përmes dhunës apo përdorimit të armëve.
Në reagim kërkohet:
hetim i plotë, transparent dhe i paanshëm i rastit;
zbardhja e motiveve reale të sulmit;
garanci konkrete për sigurinë e avokates Syarta Saliu-Osmani;
tolerancë zero ndaj kërcënimeve me prapavijë politike.
Dhoma e Avokatëve shpreh solidaritet të plotë me avokaten Syarta Saliu-Osmani dhe me të gjithë avokatët që përballen me rrezik për shkak të punës së tyre profesionale dhe angazhimit publik, duke theksuar se heshtja përballë rasteve të tilla përbën bashkëfajësi.
“Avokatët nuk do të frikësohen. Drejtësia nuk do të heshtë,” përfundon reagimiNGA Avokatja M-r Hamdije Ademi Tafa, Zëvendëskryetare e Dhomës së Avokatëve të Republikës së Maqedonisë së Veriut.
