Valbona Adili-Emini, anëtare e Delegacionit të Kuvendit të Republikës së Maqedonisë së Veriut në Asamblenë Parlamentare të Organizatës së Bashkëpunimit Ekonomik të Detit të Zi (PABSEK), mori pjesë në Forumin Energjetik Ndërkombëtar "Ajder 2026", që po mbahet më 15 dhe 16 janar 2026 në Rize, Republika e Turqisë.

Forumi mblodhi së bashku përfaqësuesit e parlamenteve, qeverive, institucioneve ndërkombëtare, komunitetit të akademisë dhe sektorit privat nga rajoni i Detit të Zi dhe më gjerë, me fokus në zhvillimet aktuale në sektorin energjetik, tranzicionin energjetik, inteligjencën artificiale dhe bashkëpunimin rajonal.

Deputetja Adili-Emini mori pjesë në panelin "Qëndrimet e deputetëve pjesëmarrës", ku e theksoi rëndësinë e rolit të parlamenteve në krijimin e politikave të qëndrueshme energjetike dhe forcimin e bashkëpunimit rajonal.

Në fjalimin e saj drejtuar pjesëmarrësve në forum, deputetja Adili-Emini theksoi përpjekjet e Republikës së Maqedonisë së Veriut në transformimin energjetik dhe forcimin e pavarësisë energjetike. Ajo theksoi se vendi ka bërë përparim të konsiderueshëm në zhvillimin e burimeve të rinovueshme të energjisë, veçanërisht në energjinë diellore, e cila ka shënuar rritje të shpejtë falë investimeve vendase dhe të huaja.

“Energjia sot është më shumë sesa një sektor ekonomik. Është një fushë kryesore që ndikon në sigurinë kombëtare, stabilitetin rajonal, qëndrueshmërinë ekologjike dhe marrëdhëniet ndërkombëtare”, tha deputetja Adili-Emini.

Në fjalimin e saj, ajo e theksoi rëndësinë e bashkëpunimit rajonal, veçanërisht përmes projekteve të ndërlidhjes ndërkufitare, integrimit të tregjeve rajonale të energjisë elektrike dhe diversifikimit të rrugëve të furnizimit.

Deputetja theksoi veçanërisht rëndësinë e bashkëpunimit me Turqinë, një vend që luan rol vendimtar në tranzitin energjetik rajonal.

Adili-Emini theksoi gjithashtu rëndësinë e inovacioneve në sistemet energjetike, duke i përfshirë teknologjitë e ruajtjes së energjisë, zhvillimin e rrjeteve inteligjente, hidrogjenin si bartës i ri energjetik dhe mjetet digjitale të monitorimit. Ajo theksoi se Maqedonia e Veriut po punon për të krijuar kushte përkatëse legjislative dhe të investimeve për këto teknologji.

“Pa përfshirje sociale, asnjë përparim teknologjik nuk mund të arrijë potencialin e tij të plotë”, tha deputetja, duke theksuar nevojën për të përfshirë inxhinierët, teknikët, studiuesit dhe komunitetet lokale në procesin e tranzicionit energjetik.

Në përfundim të fjalimit të saj, deputetja Adili-Emini e riafirmoi angazhimin e Kuvendit të Republikës së Maqedonisë së Veriut për bashkëpunim me të gjithë partnerët e përfaqësuar në forum, duke theksuar se e ardhmja e energjisë do të përcaktohet nga puna e përbashkët e komunitetit të kombeve të përkushtuara ndaj së mirës së përbashkët.

Asaj iu dhurua pllakatë nga organizatori për pjesëmarrjen aktive në forum.

Forumi mbuloi një spektër të gjerë temash, duke përfshirë inovacionet në sektorin energjetik, konkurrencën energjetike në rajonin e Detit të Zi dhe Euroazi, inteligjencën artificiale në energjetikë, të ardhmen bërthamore të Turqisë, si dhe rolin e sektorit privat në energjetikë.