63 vjet më parë, në 13 janar të vitit 1963, u vu në skenë baleti i parë shqiptar, “Halili dhe Hajrija”.

Vepra me të njëjtin titull e Kolë Jakovës, shkruar në vitin 1949, frymëzoi kompozitorin Tish Daia për kompozimin e vijës melodike. Ashtu si edhe drama, baleti ishte një himn kushtuar bëmave të luftëtarëve të Malësisë së Madhe ndaj zgjedhës turke të shekullit XVIII.

Koreograf i “Halilit dhe Hajrijes” ishte i mirënjohuri Panajot Kanaçi dhe u interpretua nga trupa e balerinëve të Teatrit të Operas dhe të Baletit (TOB) ndërsa orkestra u dirigjua nga Mustafa Krantja.

Shfaqja korri sukses si kurrë më parë sepse deri atëherë, Teatri Kombëtar i Operas dhe Baletit nuk kishte repertor vendas dhe vinte në skenë vetëm pjesë të huaja. Përgjatë viteve shfaqja u vu me qindra herë në skenën e TOB.

“Halili dhe Hajrija” është shfaqur edhe jashtë vendit, në Kosovë (1979), në Greqi (1983), në Itali (1991) dhe në Francë (1980).