Zjarri i përjetshëm i kujtesës dhe i betimit kombëtar, që në trevat tona para 30 vitesh u përflak në Kërçovë dhe që nuk u shua kurrë, do të ndizet sërish më 15 janar 2026, në ora 16:00 përpara Shtëpisë së Kulturës në Gostivar. Në vendin ku për dekada kjo flakë u ruajt si amanet i shenjtë i idealeve të lirisë. Në këtë ditë domethënëse, veprimtari dhe drejtori i manifestimit, Luan Veliu i cili për më shumë se 20 vite e mbajti të ndezur Flakën e Janarit në Gostivar, do ta dorëzojë flakadanin, në formë amaneti te Kryetari i Këshillit Organizativ, Mirvan Xhemaili për ta bartur drejt Kumanovës. Manifestimi qëndror do të kulmojë më 17 janar 2026, me fillim në ora 17:00 në Shtëpinë e Kulturës të Komunës së Likovës, në fshatin Mateç të Karadakut. Kështu, kjo trevë e sakrificës, qëndresës dhe e krenarisë shqiptare këtë vit do të shndërrohet në vatër të flakës që lidh kujtesën historike me përgjegjësinë e brezave të ardhshëm. Vazhdimësia e Flakës së Janarit, e cila do të qarkullojë nga viti në vit në qytetet dhe trevat shqiptare nuk përfaqëson thjesht një akt ceremonial, por një betim brezash dhe një lidhje të pashkëputshme mes së kaluarës, së tashmes dhe së ardhmes. Flaka ecën...Kujtesa jeton...Ideali vazhdon

Me konsideratë, Këshilli Organizativ i “Flakës së Janarit” 2026 përbërë nga: Shoqëria “Lëvizja”, SHVL–UÇK, dhe SHKA “Lulet e Malësisë”!