Pas një karriere të gjatë dhe të përkushtuar në shërbim të besimtarëve myslimanë në Kërçovë dhe rrethinë, imami i Xhamisë Qendrore, hoxhë Imer Jusufi, del në pension. Ai do të mbahet mend si imami i parë që ligjëroi në gjuhën shqipe në Xhaminë historike Sulltan Bajaziti në Kërçovë.

Imer Jusufi ka lindur në fshatin Radush të Shkupit. Shkollën e mesme fetare – Medresenë “Alaudin” – e kreu në Prishtinë, ndërsa studimet universitare i vazhdoi në Fakultetin e Shkencave Islame në Sarajevë, të cilat i përfundoi me sukses, pavarësisht kushteve të vështira ekonomike. Babai i tij, njeri i devotshëm dhe fetar, e mbështeti që të ndiqte rrugën e dijes dhe të arsimit.

Në fillim të viteve ’90, si imam i sapodiplomuar dhe pa punë, hoxhë Imeri konkurroi për vendin e imamit në Xhaminë Sulltan Bajaziti në Kërçovë dhe u pranua. Me ardhjen e tij, filloi një kapitull i ri për këtë xhami: për herë të parë, ligjërimi u zhvillua jo vetëm në gjuhën maqedonase, por edhe në gjuhën shqipe.

Në një periudhë kur përdorimi i gjuhës shqipe përbënte sfidë dhe presion, hoxhë Imeri u ballafaqua me kërcënime, por nuk u dorëzua. Ai vazhdoi ligjërimin dygjuhësh, duke shërbyer për të gjithë besimtarët dhe duke ruajtur harmoninë ndërfetare.

Një nga aktivitetet më të rëndësishme dhe të mirëpritura nga qytetarët e Kërçovës ishte mësimi i besimit islam për fëmijë dhe të rinj, i cili u zhvillua për shumë vite në këtë xhami. Nga ky mision edukativ dolën breza nxënësish që sot kontribuojnë në fusha të ndryshme të shoqërisë.

Me të njëjtin përkushtim dhe devotshmëri, hoxhë Imer Jusufi shërbeu për 35 vite rresht, duke lënë pas një trashëgimi të çmuar shpirtërore, arsimore dhe kombëtare. Qytetarët e Kërçovës shprehin mirënjohje dhe falënderim për kontributin e tij shumëvjeçar, guximin dhe përkushtimin në shërbim të fesë, gjuhës dhe harmonisë ndërfetare.

Sot, myftinia e Kërçovës organizoi një ceremoni solemne për daljen në pension të imamit Imer Jusufi. Ceremoninë e hapi sekretari i myftinisë, Xhemail Ahmeti, i cili e uroi imamin për kontributin e tij.

Myftiu i Kërçovës, Qamil ef. Rushiti, në fjalën e tij vlerësoi lartë angazhimin e imamit Imer Jusufi, duke theksuar se gjatë 35 viteve ai ka qenë pjesë e çdo familjeje kërçovare në momente gëzimi dhe sfide.

Në përfundim, si myftinia e Kërçovës, ashtu edhe Këshilli i Xhamisë Sulltan Bajaziti i ndanë hoxhë Imer Jusufit mirënjohje për kontributin e tij të jashtëzakonshëm në jetën fetare dhe shoqërore të komunitetit.