Si opozitarja LSDM, po ashtu edhe partia në pushtet VMRO-DPMNE, me thirrje drejt Prokurorisë që të veprojë mbi skandalet e partisë rivale. Socialdemokratët kërkojnë nga Prokuroria që të nisë hetim për skandalin me tenderë prej gati 9 milionë eurosh, i cili sipas tyre i është dhënë një kompanie me vetëm dy të punësuar. Sipas LSDM-së, pushteti aktual po vazhdon “skemat e vjetra të Gruevskit dhe Mijallkovit”, duke u vjedhur qytetarëve paratë përmes praktikave të njëjta korruptive.

“Prokuroria Publike nuk duhet të hesht, por të veprojë. Vjedhja e popullit përmes skemave korruptive për larjen e parave duhet të ndalet dhe të ketë përgjegjësi. Bëhet fjalë për 9 milionë euro para të qytetarëve, të cilat duhet të përfundojnë te qytetarët, e jo në xhepat e kupolës së pushtetit dhe të “Pallatit të Bardhë””, tha Bogdanka Kuzevska – zëdhënëse LSDM.

Edhe VMRO-DPMNE me apel drejt prokurorisë, por për një çështje tjetër – skandalin me fondet IPARD.  Sipas tyre, Zaev, Filipçe dhe Lupço Nikollovski dyshohen për skemë korrupsioni ku fshirja e 2000 tonëve grurë me vlerë 800,000 euro dyshohet se është shpërblyer më pas me një grant prej 1.4 milionë eurosh për kompaninë e familjes Zaev.

“Përfituesi i këtij granti evropian është kompania “Trogoprodukt” e familjes Zaev, brendi i njohur “Mamas”. Edhe më të dyshimtë e bën fakti që, në atë kohë, ky grant prej 1.4 milionë eurosh ka qenë granti i dytë më i madh në historinë e programit IPARD. Dhe ky nuk është rasti i vetëm i tillë, prandaj e ftojmë Prokurorinë ta hetojë këtë deri në fund”, u shpreh Valentin Manasievski – VMRO-DPMNE.

Nga VMRO-DPMNE përfundojnë duke thënë se tani është shansi që Prokuroria të dëshmojë veten, duke nisur procedurë sipas informacioneve të marra dhe t’i verifikojë të gjitha këto dyshime. Gjersa nga LSDM zotohen se do ta vazhdojnë luftën kundër korrupsionit dhe krimit të pushtetit.