Jeta Qerimi është emëruar drejtoreshë e Shtëpisë së Shëndetit në Kërçovë. Lajmin e ka bërë të ditur zëvendëskryeministri Arbër Fetai përmes një postimi në Facebook.

“Sot prita në zyrën time drejtoren e re të Shtëpisë së Shëndetit në Kërçovë, Jeta Qerimi, të cilës i urova përzemërsisht emërimin në këtë detyrë të rëndësishme,” ka shkruar Fetai.

Ai ka vlerësuar formimin profesional të Qerimit, i cili përfshin studime në Kosovë dhe Austri, duke theksuar se ajo përfaqëson kombinimin e energjisë dhe vizionit të të rinjve, fuqisë dhe përkushtimit të grave në pozita udhëheqëse, si dhe qasjeve të reja të bazuara në përvojat më të mira evropiane.

“Besoj thellë se përfshirja më e madhe e grave dhe e të rinjve në pozicione vendimmarrëse është çelësi për modernizimin e institucioneve tona dhe për sjelljen e frymës së re që i nevojitet vendit,” ka theksuar Fetai në fund të postimit.