e zyrtarisht Feti Abazi do të jetë kryetar i Komunës së Bogovinës. Ai sot së bashku me 19 këshilltarët e zgjedhur për këshillin e komunës mori certifikatën nga Komisioni Komunal Zgjedhor në Bogovinë. Më pas në zyrën e kryetarit të komunës është bërë edhe pranim dorëzimi i funksionit nga ish kryetari Besnik Emshiu. Ky i fundit është shprehur se Komunën e Bogovinës e dorëzon me një saldo pozitive. Ai tha se komunën e dorëzon pa borxhe.

“Janë rreth 18 projekte të ndryshme që janë në realizim e sipër dhe vlera e tyre është rreth 5 milionë euro. Nuk kemi pasur mundësi që për shkak të zgjedhjeve të bëjmë shpalljet për realizimin e projekteve, por besoj se kryetari i ri i Komunës së Bogovinës do t`i realizojë këto projekte. Falënderoj gjithë qytetarët e Komunës së Bogovinës që dolën në zgjedhje, votuan dhe besoj se kryetari i ri do ta bëjë më të mirën të mundshme për të punuar në interes të banorëve. Gjatë katër viteve kam punuar me përkushtim që çdo vendbanim të ketë kushte sa më të mira për jetesë”, deklaroi Besnik Emshiu, ish kryetar i Komunës së Bogovinës.

Në ndërkohë, prioritet për kryetarin e ri të kësaj komune Feti Abazi do të jetë infrastruktura dhe projektet kapitale që kanë të bëjnë me përmirësimin e kushteve për jetë më të mirë të qytetarëve. Abazi paralajmëroi edhe një skenim të gjendjes në komunë. “Do të respektojmë të gjitha palët dhe programin që e kemi transmetuar dhe premtuar deri tek qytetarët në fushatën parazgjedhore. Mendojmë se prioritetet në nivel komunal do të jenë projektet infrastrukturore, projektet e ujësjellësve dhe kanalizimeve, përfshirë këtu të gjitha sferat mundësisht që të realizojmë të gjitha premtimet për çdo vendbanim që kemi dhënë gjatë kampanjës. Para se të fillojmë me realizimin e projekteve që kemi dhënë ne që në ditët e para do të bëjmë skenim të gjendjes në komunë duke parë edhe projektet që janë në implementim e sipër, por edhe të ndjekim shpalljet për projektet në të ardhmen”, deklaroi kryetari i Komunës së Bogovinës, Feti Abazi.

Ndryshe, në zgjedhjet e 2 nëntorit, kandidati i Koalicionit VLEN Feti Abazi ka marrë 6380 vota, ndërsa Besnik Emshiu nga Aleanca Kombëtare për Integrim ka marrë 5040 vota. Në ndërkohë, për sa i përket këshillit komunal, koalicioni VLEN ka 9 këshilltarë, ndërsa 10 këshilltarë ka koalicioni Aleanca Kombëtare për Integrim.