Shqipëria ka hyrë në javën vendimtare sa i përket fatit të saj në Botërorin 2026.

Kuqezinjve u mjafton një fitore me Andorrën dhe Anglia të mposhtë në “Wembley” Serbinë, në mënyrë që të arrijmë vendin e dytë që na dërgon në “play-off”

Ish-futbollisti i Kombëtares shqiptare, Redi Jupi, ka analizuar në “Procesin Sportiv” ekipin kuqezi, duke u shprehur se Sylvinho nuk duhet të ndryshojë formacionin që përdori në fitoren historike kundër Serbisë një muaj më parë.

“Nuk besoj se do kemi ndryshime të mëdha. Madje mendoj se nuk do ketë asnjë ndryshim në raport me ndeshjen e fundit që zhvilluam me Serbinë. Është një skuadër që iu përgjigj trajnerit. Një skuadër që Sylvinhos i janë përgjigjur, i kanë dhënë ato rezultate. Një skuadër me ulje-ngritje të lojtarëve, por kjo do varet shumë nga gjendja fizike se si ata kanë ardhur në grumbullim. Nëse s’ka dëmtime e lëndime, mbase-mbase do të ketë ndonjë përfshirje të Ismajlit që ka luajtur titullar me skuadrën e tij, pjesa tjetër s’do të ketë ndryshime. Është e pritshme.

Pavarësisht diskutimeve dhe polemikave, trajneri në 11-shen e parë ka qenë koherent në zgjedhjet e tij. Në shumicën e ndeshjeve ata janë përgjigjur, kanë bërë atë që trajneri ka dashur dhe si e ka përgatitur skuadrën. Kemi qenë në një linjë deri më tani. Vërtet po luajmë me një skuadër shumë më poshtë nesh, por ju e dini shumë mirë: kur ne na është dashur fitore kundër këtyre skuadrave, ne jo gjithmonë kemi qenë gati. Një ndeshje që na ka surprizuar të gjithëve ishte ajo me Serbinë, sepse jo vetëm që fituam jashtë, por në një ditë që na duhej. Kjo ka ndodhur shumë rrallë në futbollin shqiptar.

Koeficienti tani është shumë më i ulët, rrezikshmëria është më e ulët. Trajneri nuk ka pse të aktivizojë lojtarë të tjerë. Ata mund t’i aktivizojë me Anglinë. Mendoj se nuk duhet ndryshuar formacioni i përdorur me Serbinë,” tha Jupi.