Ministrat e Punëve të Jashtme të Bullgarisë dhe Maqedonisë së Veriut nënshkruan marrëveshjen për ndërtimin e tunelit hekurudhor ndërkufitar, si pjesë e Korridorit 8.

Tuneli do të jetë i gjatë 1,4 kilometra, pra 1,2 kilometra nga ana e Maqedonisë dhe 1,2 kilometra nga ana bullgare.

Nënshkrimi vjen pas mosmarrëveshjeve me vite nga të dyja palët, ndërsa për firmosjen e dokumentit u ndërmjetësua edhe nga Brukseli. Ministri maqedonas Aleksandar Nikollovski tha se lidhja hekurudhore mes Shkupit dhe Sofjes është realizimi i ëndrrës së gjeneratave ndër vite. Për hekurudhën nga Kumanova deri te kufiri bullgar do të nevojiten të paktën 800 milionë euro.

Buxheti minimal për hekurudhën nga Kumanova deri te kufiri është rreth 810 milionë euro, nga të cilat 200 milionë janë fonde nga BE.

Kolegu i tij bullgar tha se për këtë hekurudhë është folur më shumë se një shekull dhe sot më në fund vendoset nënshkrimi për realizim.

Marrëveshja u nënshkrua në prani të përfaqësuesve të Komisionit Evropian, NATO-s, SHBA-ve, Bankës Evropiane për Investime, Bankës Evropiane për Rindërtim dhe Zhvillim dhe Bankës Botërore.

Hekurudha Shkup-Sofje, ndërtimi i së cilës ka filluar në vitin 1994, po ndërtohet në tre faza dhe vlerësimet e institucioneve kompetente janë se me të do të rritet transporti i mallrave mbi 30 për qind, ndërsa trafiku i udhëtarëve për 20 deri në 25 për qind në vitet e para pas ndërtimit.

Deri tani është përfunduar plotësisht ndërtimi dhe rikonstruksioni i pjesës së parë Kumanovë-Belakovcë me gjatësi 30,8 kilometra dhe me vlerë 40,5 milionë euro.