Pavarësisht se janë harxhuar miliona euro për sistemin e ndërtimit të rrjetit të gazifikimit në vend, projekti vazhdimisht është zvarritur me vite ndërsa sistemi nuk është ende funksional në tërësi. Në ndërkohë, interkonektori i gazsjellësit midis RMV-së dhe Greqisë pritet të jetë funksional në vitin 2027, shkruan Portalb.mk.

Ndonëse ndërtimi i tubacioneve të gazifikimit ka përfunduar në të gjitha segmentet në të gjithë vendin, ende nuk janë vënë në funksion.

Nga Ministria e Energjetikës sqaruan për Portalb.mk se vënia në funksion e tubacioneve të gazifikimit do të kryhet pas testimit të tyre, gjatë të cilit do të duhet të ketë konsumatorë të interesuar të gazit në vend (amvisëri, industri, etj). Megjithatë, nuk treguan se kur konkretisht pritet të bëhet kjo.

“Qeveria synon të krijojë një model për financimin, projektimin, ndërtimin, menaxhimin, mirëmbajtjen dhe zhvillimin e sistemit të shpërndarjes së gazit natyror në të gjithë vendin. Ka investitorë turq të interesuar për zbatimin e shpërndarjes së gazit dhe ata janë në fazën e përgatitjes së dokumentacionit përgatitor”, thanë nga Ministria e Energjetikës.

Për atë se si do të lidhen bizneset dhe amvisëritë me këtë sistem ngaMinistria e Energjetikëssqaruan se partneri privat do të jetë i detyruar të ndërtojë rrjetin e shpërndarjes për konsumatorët (institucionet publike, përdoruesit rezidencialë dhe komercialë) duke përfshirë pajisjet e matjes dhe rregullimit (MRE), të shpërndajë gazin natyror, të menaxhojë sistemin e shpërndarjes së gazit natyror, të mirëmbajë dhe zhvillojë sistemin e shpërndarjes, si dhe të investojë në përshtatjen/prokurimin e pajisjeve për prodhimin e energjisë termike në kapacitetet ekzistuese. 

Nga Nomagasnuk u përgjigjën në pyetjet gazetareske. 

Procesi i gazifikimit në RMV është zvarritur dhe ka ecur shumë ngadalë ndër vite, të cilën e ka vërtetuar edhe Enti Shtetëror i Revizionit, duke vënë në pah se ky proces ka pasur ndikim negativ në tranzicionin energjetik. 

Në periudhën prej vitit 2014 deri në vitin 2023 për ndërtimin e disa pjesëve të tubacioneve, janë nënshkruar marrëveshje dhe anekse në vlerë prej 156.4 milionë euro. 

Në ndërkohë, pas shpenzimit të 156.4 milionë eurove për gazsjellës dhe 2 milionë eurove të tjera për shpronësim, vitin e kaluar Prokuroriaka njoftuar se po shqyrton mundësitë për keqpërdorime të mundshme në këtë projekt.

Lidhur me këtë projekt së fundmi reaguan edhe Inxhinierët e RMV-së, sipas të cilëve po shpenzohen 54 milionë euro pa asnjë përfitim dhe se nevojitet që Prokuroria të veprojë. 

Megjithatë, nga Prokuroria Publike nuk tregojnë se deri ku janë hetimet.

Ndërtimi i gazsjellësit megjithëse ishte planifikuar të fillonte në vitin 2010, projekti u vonua për rreth 6 vjet gjatë qeverisë së Nikolla Gruevskit, ndërsa filloi në vitin 2016. 

Sa i përket furnizimit të përgjithshëm, Maqedonia e Veriut nuk ka burime të veta dhe e importon gazin. 

Në ndërkohë, në maj 2025 është nënshkruarmarrëveshja për ndërtimin e interkonektorit të gazsjellësit midis RMV-së dhe Greqisë, i cili pritet të jetë funksional në vitin 2027.

Interkonektori, me gjatësi 68 kilometra, në territorin e Maqedonisë së Veriut, do të mundësojë transportin e gazit natyror dhe hidrogjenit, duke kontribuar në sigurinë energjetike, duke ulur ndotjen dhe duke përshpejtuar kalimin në burime të energjisë së gjelbër. 

Projekti, vlera e të cilit vlerësohet mbi 5.1 miliardë denarë, do të zbatohet me mbështetjen e Bashkimit Evropian, Bankës Evropiane të Investimeve (BEI) dhe Bankës Evropiane për Rindërtim dhe Zhvillim (BERZH), përmes granteve, asistencës teknike dhe kredive të buta. 

Ndërtimi i interkonektorit ndërmjet Maqedonisë së Veriut dhe Greqisë paraprakisht kishte ngecur në përzgjedhjen e realizuesit që do e ndërtojë atë.