Drejtoria e Doganave konfiskoi 130 kilogramë mariuhanë e cila në tregun e “zi” do të kushtonte mbi 700 000 euro.

Me këtë, siç tha sot drejtori i Drejtorisë, Boban Nikollovski, është parandaluar kanal ndërkombëtar i tregtisë së jashtëligjshme me drogë.

Sipas Nikollovskit, bëhet fjalë për mariuhanë cilësore e cila, sa më shpejt që është e mundur, do t’i dorëzohet Agjencisë për Konfiskimin e Pasurisë.

Një person është privuar nga liria dhe kundër tij është parashtruar kallëzim penal. Bëhet fjalë për shtetas serb, pronar dhe shofer i kompanisë transportuese të regjistruar në Lubjanë.

“Mariuhana është konfiskuar pa paralajmërim dhe kjo nuk ndodh çdo dit. Nëpunësit tanë kanë mjaftueshëm përvojë të vlerësojnë çka të kontrollojnë, ndërsa rezultati është më se i dukshëm”, theksoi Nikollovski në konferencë për media.

Siç informoi drejtori, duke drejtuar një automjet, në dalje të Maqedonisë, në vendkalimin kufitar Tabanoc, kryerësi ka bërë përpjekje ta fshehë mariuhanën, duke dhënë deklaratë të rreme te nëpunësit doganorë. Automjetin e kishte raportuar si të zbrazët dhe kishte thënë se nuk ka asgjë për doganim.

“Gjatë kontrollit, nëpunësit vunë re se paletat ishin riformësuar posaçërisht dhe jo në një formë standarde, dhe pas tyre ishin disa çanta. Kur u pyet për përmbajtjen e mallrave në çanta, shoferi deklaroi se po transportonte cigare dhe u përpoq të ofronte ryshfet, gjë që u refuzua menjëherë dhe vazhdoi me një kontroll të detajuar, gjatë të cilit në çanta u gjetën 131 pako me 130 kilogramë marihuanë”, theksoi Nikollovski.