Ministrja për Evropën dhe Punët e Jashtme, Elisa Spiropali zhvilloi sot një takim Bruksel, me drejtorin e përgjithshëm për Zgjerimin dhe Fqinjësinë Lindore në Komisionin Evropian (DG ENEST), Gert Jan Koopman.

Spiropali bëri të ditur se në takim u diskutua për bashkëpunimin intensiv që “DG ENEST” ka me institucionet e Shqipërisë për agjendën e reformave dhe integrimin e shpejtë.

Drejtori i përgjithshëm për Zgjerimin dhe Fqinjësinë Lindore në Komisionin Europian (DG ENEST), Gert Jan Koopman, në një postim në rrjetet sociale, thekson se Shqipëria ka bërë përparim të dukshëm në reformat dhe angazhimet e saj në Agjendën e Reformave.

“Shqipëria, duhet ta mbajë këtë ritëm për të arritur objektivin e mbylljes së negociatave deri në fund të 2027-ës. Punë e vështirë, por Shqipëria ka treguar se mund ta bëjë”, shkruan Koopman.

Ministrja për Evropën dhe Punët e Jashtme ndodhet në Bruksel, ku po zhvillon takime me përfaqësuesit e lartë të Komisionit Evropian.

Ditën e djeshme Spiropali u prit në takim nga zëvendëspresidentja e Komisionit Evropian, Kaja Kallas, e cila është gjithashtu Përfaqësuese e Lartë për Punët e Jashtme dhe Sigurinë.

Takimet e Spiropalit në Bruksel kanë në fokus ecurinë e Shqipërisë në çeljen e negociatave për anëtarësim në Bashkimin Evropian.

Në 11 muaj Shqipëria ka hapur 5 grup-kapituj të negociatave me BE-në, ndërkohë që synon të hapë brenda këtij viti edhe grup-kapitullin e fundit.