Në Klinikën Universitare të Oftalmologjisë në Shkup, për herë të parë janë kryer ndërhyrje kirurgjikale në retinë/makulë me sistemin e vizualizimit 3D NGENUITY 3D Visualization System. Gjatë muajit të kaluar, në dy seanca të ndryshme, u operuan gjashtë pacientë me sëmundje të retinës nga kirurgu vitreo-retinal dr. Lukan Mishev nga Republika fqinje e Bullgarisë. Ndërkohë, mjekët e Klinikës nga departamenti i retinës – Doc. dr. Natasha Trpevska Shekerinov, Prim. dr. Gazmend Mehmeti dhe specializanti dr. Stefan Pandilov – u trajnuan për këtë lloj ndërhyrjeje kirurgjikale, të cilën në periudhën e ardhshme do ta kryejnë në klinikën tonë. Bëhet fjalë për përdorimin e teknologjisë 3D gjatë operacionit në makulë pa përdorimin e okularëve tradicionalë, me pamje 3D me rezolucion të lartë dhe perceptim të përmirësuar të thellësisë, çka mundëson analizë më të saktë të strukturave retinale dhe manipulim më të hollësishëm gjatë ndërhyrjes. Procesi operativ u transmetua drejtpërdrejt (live stream) dhe u ndoq nga oftalmologë të tjerë dhe mjekë në specializim në klinikë, me ç’rast Klinika Universitare e Oftalmologjisë në Shkup edhe një herë e konfirmoi statusin e saj si qendër terciare e shkencës dhe praktikës moderne oftalmologjike, ku arsimimi dhe inovacioni janë pjesë e punës së përditshme. Një moment veçanërisht i rëndësishëm ishte edhe përdorimi i angiografisë me fluoresceinë intraoperative, që përbën risi në praktikën tonë klinike. Kjo metodë mundëson vlerësim në kohë reale të ndryshimeve vaskulare në qarkullimin retinal gjatë vetë procesit kirurgjikal.