Një operacion i Shërbimit Kundër Terrorizmit ka përfunduar me bastisjen e zyrave të stacionit televiziv të opozitës, TELE1, në Stamboll, të premten në mëngjes. Pas një urdhri gjykate, forcat e policisë kanë ndërhyrë në zyrat e stacionit dhe kanë arrestuar drejtorin e përgjithshëm të lajmeve, Merdan Yanardag.
Gazetari Göhan Kayış, prezantues i emisionit të mëngjesit në TELE1, ka transmetuar drejtpërdrejt operacionin, duke informuar shikuesit për zhvillimet që ndodhën që nga orët e para të mëngjesit. Ai bëri me dije se rreth 50 anëtarë të ekipit të Shërbimit Kundër Terrorizmit (TEM) morën pjesë në bastisje dhe se autoritetet refuzuan të japin informacion mbi kontaktet me Yanardag, duke shtuar se ai mund të ishte tashmë në paraburgim.
Pas arrestimit, Zyra e Prokurorit njoftoi se Merdan Yanardag ishte ndaluar për akuzën e spiunazhit, lidhur me një përpjekje për të ndryshuar të dhënat e zgjedhjeve lokale të vitit 2019 në bashkëpunim me kryetarin e ndaluar të Stambollit, Ekrem Imamoglu, si dhe agjencitë e huaja.
Avokati i Yanardag, Bilgütay Haki Durna, ka deklaruar se ende nuk është njohur me materialet e dosjes, duke shtuar se akuzat janë bërë pa prova të mjaftueshme. Ai theksoi se “është e pamundur të vihet në dyshim identiteti patriotik i Merdan Yanardag” dhe që në vendin e tij shpesh ndodhin raste kur akuzat serioze bëhen pa bazë.
Përkundër situatës, ai ka përgëzuar familjen e gazetarit, duke thënë se ata janë “moralikisht të fortë” dhe të përgatitur për një mundësi të tillë për shkak të angazhimit të Yanardag në media. Procesi ligjor do të vijojë për të siguruar të drejtat e tij.
