Shkëndija e Tetovës ka fituar ndeshjen e Ligës së Konferencës përballë Shelburn, duke marrë pikët e para në fazën në grupe të turneut ku janë debutues.

Në një ndeshje shumë të luftuar në Shkup, kuqezinjtë e Tetovës i kanë rezistuar sulmeve të ekipit irlandez, teksa kanë tentuar që të thumbonin portën kundërshtare me kundërzbritje. Por në fund, do të ishte një autogol në minutën e 92-të, ai që do të vuloste fatin e takimit, duke bërë që të shpërthente festa e kuqezinjve për këtë triumf historik.

Drita e ka regjistruar barazimin e dytë në po kaq ndeshje në fazën e ligës në Ligën e Konferencës. Kampionia në fuqi e Kosovës barazoi 1-1 në stadiumin “Fadil Vokrri” ndaj klubit nga Qipro, Omonia. Vendasit kaluan të parët në epërsi në minutën e 12-të kur Arb Manaj shënoi bukur me kokë pas asistit nga Besnik Krasniqi. Fundi i pjesës së parë ishte fatal për gjilanasit, që pësuan gol në minutën e parë shtesë.

Ishte Masouras i cili realizoi për 1-1, që në fund ishte edhe epilogu i këtij takimi. Me këtë barazim, Drita tani ka dy pikë dhe zbret përkohësisht në vendin e 20-të. Në anën tjetër, Omonia e shijon pikën e parë dhe ngjitet në vendin e 23-të në tabelë.