Një grup paleontologësh argjentinas ka bërë një zbulim të rrallë në rajonin e pasur me fosile të Río Negro-s: një vezë dinozauri 70 milionë vjeçare, e ruajtur në gjendje pothuajse perfekte.

Gonzalo Leonel Muñoz, paleontolog në Muzeun Argjentinas të Shkencave Natyrore “Bernardo Rivadavia”, e ka përshkruar gjetjen si “një surprizë të plotë”. Ai thekson se ndërsa fosilet e dinozaurëve gjenden shpesh, vezët janë shumë më të rralla, veçanërisht ato të dinozaurëve mishngrënës.

Fotot dhe videot e publikuara nga Laboratori i Anatomisë Krahasuese dhe Evolucionit të Vertebrorëve (LACEV) tregojnë drejtuesin e ekipit, anatomistin Federico Agnolín, duke mbajtur vezën, e cila duket si e zier për shkak të ruajtjes së jashtëzakonshme. Afër saj është gjetur edhe një fole e plotë, duke e bërë zbulimin edhe më unik.

Sipas studiuesve, kjo vezë i përkiste Bonapartenykus, një dinozaur i vogël mishngrënës që jetoi gjatë periudhës së vonë Kretake. “Zakonisht gjejmë vezë të dinozaurëve barngrënës, si sauropodët me qafa të gjata, por kjo ka formë sferike dhe guaskë më të trashë,” shpjegon Muñoz.

Veza dhe gjetjet e tjera do të dërgohen për analiza në Muzeun Argjentinas të Shkencave Natyrore, ku shkencëtarët do të kryejnë skanime të hollësishme për të verifikuar nëse brenda vezës ruhet ende një embrion. Ky informacion mund të ndihmojë në përcaktimin e saktë të llojit dhe të ofrojë të dhëna të rëndësishme mbi evolucionin e dinozaurëve drejt zogjve modernë.

Paleontologët theksojnë se vezët e dinozaurëve mishngrënës janë më delikate dhe më të rralla, pasi këto specie janë paraardhës të zogjve dhe guaskat e tyre janë më të holla dhe të brishta. Ky zbulim konsiderohet si një nga më të rëndësishmit paleontologjikë në Amerikën e Jugut në vitet e fundit./E.K 

Burimi: New York Post