Kombëtarja e Shqipërisë do të përballet me Jordaninë në një ndeshje miqësore që do të zhvillohet në “Air Albania”, teksa Sylvinho pritet ta shfrytëzojë këtë sfidë për të testuar emrat e rinj dhe për t’u dhënë pushim disa prej titullarëve që u lodhën në transfertën ndaj Serbisë.

Në portë do të ketë risi: Thomas Strakosha pritet të qëndrojë në stol, ndërsa vendin e tij do ta marrë Etrit Dajsinani. Portieri i Partizanit ka debutuar më parë si titullar në miqësoren kundër Gjibraltarit dhe tani do të ketë një tjetër mundësi për të treguar vlerat e tij.

Në repartin e mbrojtjes, Sylvinho nuk do të ndryshojë gjithçka. Gjimshiti dhe Mitaj do të mbeten titullarë, ndërsa Elseid Hysaj dhe Arlind Ajeti do t’ua lënë vendin respektivisht Ivan Balliut dhe Adrian Cakes, të cilët do të kërkojnë të bindin stafin teknik me paraqitjen e tyre.

Në mesfushë pritet të ketë hapësirë për Ramadanin, i cili do të mbështetet nga Berisha dhe Asllani, duke i dhënë skuadrës freski dhe energji në fazën ndërtuese.

Në sulm, Sylvinho pritet të bëjë rotacion të plotë. Treshja titullare që luajti ndaj Serbisë do të nisë nga stoli, ndërsa në fushë do të zbresin Hoxha, Asani dhe Daku, një treshe që premton dinamizëm dhe agresivitet në repartin ofensiv.

Kjo miqësore shihet si një provë e vlefshme për trajnerin brazilian, i cili synon të testojë alternativa të reja përpara ndeshjeve të ardhshme zyrtare të Kombëtares shqiptare.