Në çdo episod të “Top Tech” me Mateo Kadriun zbulojmë të rejat më të fundit nga bota e madhe e teknologjisë. Me informacione dhe gjithçka të detajuar rreth risive dhe mundësive që po na ofrohen çdo ditë sidomos nga Inteligjenca Artificiale me avancimin e projekteve nga më të ndryshme.
Bugatti Tourbillon është makina që duket sikur ka dalë nga një film futuristik: timon që rrotullohet rreth një boshti fiks, instrumente titani, suspensione të printuara 3D dhe difuzor gjigant që është edhe strukturë sigurie. Por surpriza më “sneaky” është sistemi i zërit: nuk ka speakera tradicionalë.
CEO i Bugatti Rimac, Mate Rimac, e tregon me krenari – “gjithë karboni i makinës është një speaker”. Në vend të magnetëve e membranave klasike, Tourbillon përdor elementë të tjerë. Këto janë kristale të vogla (si kuarci) që, kur marrin sinjal elektrik, fillojnë të bëjnë zhurmë. Zakonisht i gjen në orë kuarci ose sirena alarmi, por këtu Bugatti ka shkuar next level: i ka lidhur këta transduktorë direkt me shasinë prej karboni. Rezultati? E gjithë struktura e makinës bëhet membranë gjigante që shpërndan muzikë.
Kjo sjell disa avantazhe serioze:
• Peshë më e ulët – magnetët e speakerave janë të rëndë, ndërsa një copëz metal piezo është qesharake në krahasim.
• Zë më i pastër – rezonanca e karbonit shpërndan tingullin ndryshe, duke krijuar një përvojë akustike unike.
• Kursim hapësire – asnjë speaker në panele, gjithçka është integruar në strukturë.
Madje, subwoofer-i i makinës është thjesht një element i vogël metalik i ngjitur në çati.
Mercedesi kishte provuar diçka më të përafërt në vitin 2013 me SL, duke përdorur firewall-in si kuti rezonance për speakerat klasikë. Por Bugatti ka bërë një hap të plotë: pa speakera, vetëm teknologji.
Ironia? Pas shpinës ke një motor V16 që ulëret si orkestër simfonike. Pyetja është: kush do të dëgjojë Spotify kur muzika më e mirë është vetë motori?
