YouTube ka njoftuar se do të rikthejë disa llogari të cilat më parë ishin ndaluar për shkelje të rregullave mbi keqinformimin për pandeminë Covid-19 dhe zgjedhjet presidenciale amerikane të vitit 2020.

Ky vendim u bë publik përmes një letre të kompanisë mëmë, Alphabet, drejtuar Komitetit të Gjyqësorit në Kongres, si përgjigje ndaj një hetimi të republikanëve mbi ndërhyrjen e administratës së mëparshme Biden në moderimin e përmbajtjes online.

Në letër, kompania thekson se “YouTube vlerëson zërat konservatorë në platformë”, duke pranuar se ata kanë ndikim të madh në diskutimin publik dhe në formësimin e konsumit online.

Platforma gjithashtu ka bërë të ditur përmes një postimi në X (ish-Twitter) se do të nisë një projekt pilot të kufizuar, i cili do t’u japë mundësinë disa përdoruesve të krijojnë kanale të reja, nëse llogaritë e tyre ishin fshirë për shkak të politikave që tashmë janë hequr.

Programi i rikthimit pritet të prezantohet zyrtarisht brenda pak javësh, duke shënuar një tjetër hap në lehtësimin e politikave të moderimit të përmbajtjes nga YouTube, në linjë me ndryshimet e fundit të kompanive të tjera të mëdha teknologjike.

Flaka